ჯანელიძე: ყველაზე მნიშვნელოვანი ეტაპი რუსეთის საოკუპაციო ძალების საქართველოდან გაყვანა იქნება

"რუსეთის ფედერაცია განაგრძობს საქართველოს რეგიონების - აფხაზეთისა და ცხინვალის რეგიონის/სამხრეთ ოსეთის  ფაქტობრივი ანექსიის პოლიტიკას,  დე-ფაქტო ხელისუფლებებთან ინტეგრაციის შესახებ უკანონო შეთანხმებების ხელმოწერის გზით", - განაცხადა საქართველოს საგარეო საქმეთა მინისტრმა მიხეილ ჯანელიძემ გაერო-ს უშიშროების საბჭოს მაღალი დონის ღია დებატებზე სიტყვით გამოსვლისას.

მისი თქმით, საოკუპაციო რეჟიმის გადაწყვეტილება, რომ ჩაატაროს ე.წ. რეფერენდუმი ცხინვალის რეგიონში, რათა რეგიონს გადაერქვას სახელი და ეწოდოს "სამხრეთ ოსეთის რესპუბლიკა - სახელმწიფო ალანია", რუსეთის ფედერაციის ერთ-ერთი ფედერალური სუბიექტის მსგავსად, არის ამ პოლიტიკის კიდევ ერთი დადასტურება.

"პარალელურად, აფხაზეთში არსებულმა საოკუპაციო რეჟიმმა მიიღო გადაწყვეტილება, დახუროს საოკუპაციო ხაზის გასწვრივ მდებარე ე.წ. გამშვები პუნქტები, რაც კიდევ უფრო მეტად შეაფერხებს ადგილობრივი მოსახლეობის თავისუფალ გადაადგილებას. მოვუწოდებთ საერთაშორისო თანამეგობრობას, რომ დაგმოს და წინ აღუდგეს ამ ქმედებებს", - განაცხადა ჯანელიძემ.

მინისტრის თქმით, 2012 წლის შემდეგ, საქართველოს მთავრობა რუსეთის ფედერაციასთან ურთიერთობების დეესკალაციას კონსტრუქციული და პრაქტიკული ნაბიჯების გადადგმის გზით ცდილობს. "ჩვენ ჩამოვაყალიბეთ დიალოგის ფორმატი ისეთ საკითხებზე, როგორებიცაა ვაჭრობა, ტრანსპორტი, ხალხთა შორის კონტაქტები, დაძაბულობის განმუხტვის მიზნით, რამაც გარკვეული დადებითი შედეგები მოიტანა. ჩვენ კონსტრუქციულად ვმუშაობთ ჟენევის საერთაშორისო მოლაპარაკებების ფორმატში და ღია ვართ კონსტრუქციული დიალოგისთვის. გასული წელი აღინიშნა გალის ინციდენტების პრევენციისა და მათზე რეაგირების მექანიზმის აღდგენით. საქართველო გამოხატავს მზადყოფნას, მხოლოდ მშვიდობიანი გზით მოაგვაროს კონფლიქტი რუსეთთან, შესაბამის საერთაშორისო შეთანხმებებზე დაყრდნობითა და საერთაშორისო სამართლის ნორმებისა და პრინციპების სრული დაცვით", - განაცხადა ჯანელიძემ.

საქართველოს საგარეო საქმეთა მინისტრმა მოუწოდა რუსეთის ფედერაციას, შეცვალოს უკანონო პოლიტიკა, შეასრულოს საერთაშორისო ვალდებულებები, მათ შორის, 2008 წლის 12 აგვისტოს შეთანხმება ცეცხლის შეწყვეტის შესახებ და საერთაშორისო მონიტორინგის მექანიზმებს მისცეს ოკუპირებულ რეგიონებში წვდომის საშუალება. "უპირველეს ყოვლისა, ევროკავშირის სადამკვირვებლო მისიას, როგორც ეს აღნიშნული მისიის მანდატითაა გათვალისწინებული, ასევე, ხელი შეუწყოს ადგილზე უსაფრთხოების საერთაშორისო მექანიზმების შექმნას და საშუალება მისცეს ასობით ათას იძულებით გადაადგილებულ პირსა და ლტოლვილს,  დაბრუნდნენ თავიანთ სახლებში", - განაცხადა მინისტრმა.

ჯანელიძე მიიჩნევს, რომ რუსეთ-საქართველოს კონფლიქტის მოგვარების გზაზე ყველაზე მნიშვნელოვანი ეტაპი რუსეთის საოკუპაციო ძალების საქართველოდან გაყვანა იქნება.