საქპატენტისა და ELSA-ს საზაფხულო სკოლამ საქართველოში ათეულობით უცხოელ სტუდენტს უმასპინძლა ევროპის სხვადასხვა ქვეყნიდან

ევროკავშირის წევრი 9 სახელმწიფოს, ასევე დიდი ბრიტანეთის, მონტენეგროს, სერბეთის, თურქეთისა და აზერბაიჯანის უნივერსიტეტების იურიდიული ფაკულტეტის სტუდენტებმა, ინტელექტუალური საკუთრების სამართლის საერთაშორისო საზაფხულო სკოლის ფარგლებში, საქპატენტის ინტელექტუალური საკუთრების სწავლებისა და გადამზადების ცენტრში ინტენსიური აკადემიური პროგრამა გაიარეს.

ინტელექტუალური საკუთრების სამართლის საერთაშორისო საზაფხულო სკოლა 2016 წლიდან ყოველწლიურად იმართება ევროპის იურისტ სტუდენტთა ასოციაციასა (ELSA) და საქართველოს ინტელექტუალური საკუთრების ეროვნულ ცენტრს – „საქპატენტს“ შორის თანამშრომლობის ფარგლებში. პროგრამის არსებობის 10-წლიანი პერიოდის განმავლობაში მასში მონაწილეობა მიიღო ევროკავშირისა და ევროპის სხვადასხვა ქვეყნის წამყვანი უნივერსიტეტების 200-ზე მეტმა სტუდენტმა.

საზაფხულო სამართლის სკოლის მიზანია მომავალი იურისტებისთვის ინტელექტუალური საკუთრების სამართლის თეორიული და პრაქტიკული საფუძვლების გაცნობა, საქართველოს ინტელექტუალური საკუთრების სისტემის, ეროვნული კანონმდებლობისა და საერთაშორისო სტანდარტების შესახებ ცოდნის გაღრმავება, ასევე ახალგაზრდებს შორის საერთაშორისო პროფესიული კავშირების განვითარების ხელშეწყობა.

5-დღიანი აკადემიური პროგრამის ფარგლებში, მონაწილეებმა შეისწავლეს ინტელექტუალური საკუთრების დაცვის სხვადასხვა მიმართულება, მათ შორის: გამოგონებები და საპატენტო სისტემა, სასაქონლო ნიშნები, სამრეწველო დიზაინი, გეოგრაფიული აღნიშვნები, ასევე საავტორო და მომიჯნავე უფლებები.

პროგრამის დასასრულს მონაწილეებს სიტყვით მიმართა საქპატენტის თავმჯდომარემ სოსო გიორგაძემ. მან სტუდენტებს საზაფხულო სკოლის წარმატებით დასრულება მიულოცა და აღნიშნა, რომ ინოვაციებისა და ახალი ტექნოლოგიების ეპოქაში ინტელექტუალური საკუთრება ქვეყნების ეკონომიკური, სოციალური და კულტურული განვითარების ერთ-ერთი მნიშვნელოვანი საფუძველია. შესაბამისად, განსაკუთრებულ მნიშვნელობას იძენს მსგავსი საგანმანათლებლო ინიციატივები არა მხოლოდ ახალგაზრდებში ინტელექტუალური საკუთრების შესახებ ცნობიერების ამაღლების, არამედ ამ სფეროსადმი ინტერესის გაძლიერებისა და წარმატებული, მოტივირებული სტუდენტების პროფესიული განვითარების თვალსაზრისით.

საქპატენტის თავმჯდომარემ ასევე აღნიშნა, რომ განსაკუთრებით მნიშვნელოვანია ქვეყნებს შორის გამოცდილების გაზიარება, ერთიანი მიდგომებისა და საუკეთესო პრაქტიკის დამკვიდრება, რაც ხელს უწყობს ინტელექტუალური საკუთრების გლობალური სისტემის ეფექტიან ფუნქციონირებას.
სოსო გიორგაძემ იმედი გამოთქვა, რომ საზაფხულო სკოლის მონაწილეები დაინტერესდებიან საქპატენტის, ინტელექტუალური საკუთრების მსოფლიო ორგანიზაციისა (WIPO) და ქუთაისის საერთაშორისო უნივერსიტეტის (KIU) ერთობლივი სამაგისტრო პროგრამით – „ინტელექტუალური საკუთრება, ინოვაციები და მეწარმეობა“.

აღსანიშნავია, რომ სწავლება მიმდინარეობდა ინტერაქციულ რეჟიმში – პრაქტიკული სავარჯიშოებისა და როლური თამაშების გამოყენებით. სწავლებას უძღვებოდნენ საქპატენტის ინტელექტუალური საკუთრების სწავლებისა და გადამზადების ცენტრის WIPO-ის მიერ სერტიფიცირებული ტრენერები.

საზაფხულო სკოლის ფარგლებში, სტუდენტები ეწვივნენ საქართველოს ფინანსთა სამინისტროს შემოსავლების სამსახურის გაფორმების ეკონომიკურ ზონას „თბილისი“, სადაც გაეცნენ საბაჟო პროცედურებს, ინტელექტუალური საკუთრების უფლებების დაცვის პრაქტიკულ მექანიზმებსა და კონტრაფაქციის წინააღმდეგ ბრძოლის მეთოდებს.

სტუდენტები ასევე ეწვივნენ საქართველოს ინოვაციებისა და ტექნოლოგიების სააგენტოს (GITA), სადაც მიიღეს ინფორმაცია სააგენტოს საქმიანობის ძირითადი მიმართულებების, ინოვაციური ეკოსისტემის განვითარების ხელშემწყობი პროგრამებისა და ტექნოლოგიების ტრანსფერის მექანიზმების შესახებ. განსაკუთრებული ყურადღება დაეთმო ინოვაციებისა და საპატენტო სისტემის ურთიერთკავშირის მნიშვნელობას.

საზაფხულო სკოლის დახურვის ღონისძიება საქპატენტის მცხეთის ოფისში გაიმართა, სადაც საქპატენტის თავმჯდომარემ მონაწილეებს საზაფხულო სკოლის წარმატებით გავლის დამადასტურებელი სერტიფიკატები გადასცა.

ინფორმაციას საქპატენტი ავრცელებს.