ოჯახში ძალადობის პრევენციაზე ევროპელებს ორი ინიციატივა აქვთ

ოჯახში ძალადობისი პრევენციასთან დაკავშირებით, ევროპულ საქართველოს ორი ინიციატივა აქვთ. ამის შესახებ ოთარ კახიძემ თქვა. პირველი ინიციატივის თანახმად, ძალადობის ნიშნების არსებობის ან მუქარის შემთხვევაში, შემაკავებელი ორდერის გამოწერის ნაცვლად, ადამიანი უნდა დააკავონ. ინფორმაციას 1tv ავრცელებს.

„ევროპული საქართველოს“ ინიციატივა ოჯახში ძალადობის პრევენციისთვის გულისხმობს, რომ ძალადობის ნიშნების არსებობის ან ძალადობის მუქარის შემთხვევაში, შემაკავებელი ორდერის ნაცვლად, პირის დაკავება და მოსამართლის წინაშე მისი წარდგენა მოხდეს. ეს სავალდებულო იყოს, როგორც ამერიკის ძალიან ბევრ შტატშია, ვინაიდან იქაც ანალოგიური პრობლემა იდგა, როდესაც შემაკავებელი ორდერის გამოცემის შემდეგ მოძალადეები უფრო მძიმე დანაშაულს ჩადიოდნენ, მათ შორის მსხვერპლის სიცოცხლის ხელყოფით მთავრდებოდა“, – აცხადებს კახიძე.

მეორე ინიციატივა ადამიანის სიცოცხლის ხელყოფისთვის სანქციების გამკაცრებას გულისხმობს: "თუ დღეს განზრახ მკვლელობისთვის 7-დან 15 წლამდე პასუხისმგებლობაა განსაზღვრული, ის გაიზარდოს და 20 წლამდე თავისუფლების აღკვეთა განისაზღვროს. რაც შეეხება დამამძიმებელ გარემოებაში მკვლელობას, აქ უვადო თავისუფლების აღკვეთა უნდა გვქონდეს“, – განაცხადა კახიძემ.

შეგახსენებთ, რომ ეს საკითხი მას შემდეგ გახდა კიდევ უფრო აქტუალური რაც 13 აპრილს ბარნოვის ქუჩაზე 1993 წელს დაბადებული თაკო გამრეკელაშვილი, მცირეწლოვანი შვილების თანდასწრებით მოკლეს. მკვლელობაში ბრალდებული, დაღუპულის დედის მეგობარი კაცი 1972 წელს დაბადებული ვეფხია ბაქრაძეა, რომელიც სოფელ თელეთში დააკავეს. დაკავებულია კიდევ ერთი პირი, რომელსაც გამოძიება დანაშაულის შეუტყობინებლობას ედავება.

გაირკვა, რომ ვეფხია ბაქრაძე პრეზიდენტის მიერ იყო შეწყალებული, რაზეც დღეს მარგველაშვილმა განმარტება გააკეთა.