ვინ არის ლუკა ფეიქრიშვილი, რომელიც კუს ტბაზე შენობიდან გადახტომით იმუქრებოდა

ცოტა ხნის წინ, „ფეისბუკის“ ერთ-ერთმა მომხმარებელმა ლუკა ფეიქრიშვილმა კუს ტბის ტერიტორიაზე შენობიდან გადახტომა მას შემდეგ გადაიფიქრა, რაც მასთან შს მინისტრის მოადგილე მივიდა.

მანამდე ფეიქრიშვილი Facebook Live-ში იმუქრებოდა, რომ რადიკალურ ზომებს მიმართავდა, რადგან უსამართლო ქვეყანაში ცხოვრობს, საპატრულო პოლიციამ უკანონოდ დააჯარიმა და საპროტესტო აქციაზე მისვლა აუკრძალა. ის საზოგადოებას მხარდაჭერას, ხოლო ადგილზე მისულ პოლიციელებს მინისტრ გიორგი გახარიასთან და საპატრულო პოლიციის უფროს თემურ კუპატაძესთან შეხვედრის ორგანიზებას სთხოვდა, წინაარმდეგ შემთხვევაში შენობიდან გადახტომით იმუქრებოდა.

ლუკა ფეიქრიშვილი ინტერნეტში „ნაციონალური მოძრაობის“ მხარდამჭერად, ორგანიზაცია „ამბრელას“ წევრად და პროგრამისტადაც მოიხსენიება. ბოლო დღეებში ფეიქრიშვილი რუსთაველის გამზირზე ზვიად კუპრავას ორგანიზებულ საპროტესტო აქციებშიც მონაწილეობდა და მიტინგზე სიტყვითაც გამოვიდა.

ინტერნეტში ფეიქრიშვილზე კიდევ რამდენიმე ინფორმაცია იძებნება. 2018 წლის მარტში ის სამართალდამცველებს ცემასა და იარაღით მუქარაში ადანაშუალებდა; აცხადებდა, რომ ინციდენტი კაფე „გალერიში“ დაიწყო, რომლის დაცვის თანამშრომელიც მას ფიზიკურად გაუსწორდა, იქვე მდგომმა კრიმინალური პოლიციის თანამშრომლებმა კი არ დაიცვეს.

ერთ-ერთი რესურსის ცნობით, 2017 წლის ნოემბერში ფეიქრიშვილი სამართალდამცველებმა მთავარ პროკურატურასთან მაშინ აიყვანეს, როდესაც ის პროტესტის ნიშნად ბენზინის გადასხმას და თავის დაწვას ცდილობდა.

2017 წლის ივნისში ლუკა ფეიქრიშვილი პოლიციას „ბირჟა მაფიას“ ვიდეორგოლის ინტერნეტში მასობრივი გამოქვეყნებით ემუქრეობდა (ერთ-ერთი ვერსიით, ქართველი რეპერები სინამდვილეში პოლიციისთვის მიუღებელი ვიდეორგოლის მომზადებისთვის დააკავეს და არა ნარკოტიკის შეძენა-შენახვისთვის).

2016 წლის ივნისში მისი სახელი ნახსენებია ინტერნეტში პირადი ცხოვრების ამსახველი კადრების გავრცელებასთან დაკავშირებით. ამ ინფორმაციის თანახმად, ორგანიზაცია „ამბრელას“ წევრ ფეიქრიშვილს სოციალური ქსელის საშუალებით პირადი ცხოვრების ამსახველი კადრები გაუგზავნეს, რის გამოც ის პროკურატურაში დაიკითხა.

კუს ტბის ინციდენტის შემდეგ ლუკა ფეიქრიშვილმა „ფეისბუკზე“ დაწერა, რომ შენობიდან ჩამოვიდა და კარგად არის.