საპატრულოს უფროსი: სარალიძის მხარდამჭერებს პოლიციის შეურაცხყოფის უფლება არ აქვთ

პარლამენტის შენობის წინ, ზაზა სარალიძისა და მალხაზ მაჩალიკაშვილის აქციაზე დაკავებულ ადამიანებთან დაკავშირებით, შინაგან საქმეთა სამინისტროს საპატრულო პოლიციის დეპარტამენტის ხელმძღვანელმა თეიმურაზ კუპატაძემ გააკეთა განცხადება. კუპატაძის თქმით, უწყება უთანაგრძნობს არასრულწლოვანთა მამებს, მაგრამ ეს მათ მხარდამჭერებს არ აძლევს უფლებას, რომ პოლიციელებს შეურაცხყოფა მიაყენოს. 

როგორც თეიმურაზ კუპატაძე ამბობს, 26 სექტემბრის აქციაზე სულ 3 ადამიანი დააკავეს. მათგან ერთმა პოლიციის მანქანის კარის უკანა შუშა ჩაამსხვრია. მის წინააღმდეგ საქმე სისხლის სამართლის კოდექსის 187-ე მუხლის პირველი ნაწილით დაიწყო.

"ისინი ასევე დაკავებული არიან ადმინისტრაციული წესით 166-ე , 173-ე მუხლების საფუძველზე. ჩვენი მხრიდან ეს ქმედებები გაგრძელდება იმ პირებზე, რომლებიც აქციაზე მიმდინარე პროცესების დროს სამართალდარღვევებს ჩაიდენენ", - თქვა თეიმურაზ კუპატაძემ. 

აქციაზე ადამიანების დაკავებასთან დაკავშირებით დღეს განცხადება გაავრცელა არასამთავრობო სექტორმა. მათ მომხდარი პოლიციის მიერ მშვიდობიანი შეკრების უფლებაში უხეშ ჩარევად შეაფასეს.

პარლამენტთან აქციებს ზაზა სარალიძე და მალხაზ მაჩალიკაშვილი 10 სექტემბრიდან მართავენ. ისინი ხელისუფლების გადადგომას მოითხოვენ. 

სარალიძის შვილი, დავით სარალიძე ერთ-ერთი იყო 2017 წლის პირველ დეკემბერს ხორავას ქუჩაზე მოკლული ორი არასრულწლოვნიდან. ამ საქმეზე პარლამენტში დროებითი საგამოძიებო კომისია შეიქმნა. საგამოძიებო კომისიის პარალელურად, გამოძიებას ხელახლა აწარმოებს შინაგან საქმეთა სამინისტრო. მკვლელობის საქმეზე ახალი გარემოებების დადგენის მიზნით, გამოძიებას უშუალოდ გიორგი გახარია ხელმძღვანელობს.

მალხაზ მაჩალიკაშვილის 19 წლის ვაჟი, მაჩალიკაშვილი კი სახელმწიფო უსაფრთხოების სამსახურის მიერ პანკისის ხეობაში ჩაატარებული სპეცოპერაციის დროს დაჭრეს. ის 10 იანვარს გარდაიცვალა. გამოძიების ვერსიით, თემირლან მაჩალკაშვილსა და ამ ტერორისტულ დაჯგუფებას შორის კავშირი დადგინდა.

თემირლან მაჩალიკაშვილის მშობლებს და პანკისის უხუცესებს აჰმედ ჩატაევთან და ტერორისტებთან მაჩალიკაშვილის კავშირის არ სჯერათ.