პარლამენტთან აქციაზე განვითარებულ მოვლენებს მესამე სექტორი ეხმიანება

არასამთავრობო ორგანიზაციებმა პოლიციის მიერ მშვიდობიანი შეკრების უფლებაში უხეშ ჩარევად შეაფასეს თბილისში, პარლამენტის წინ ზაზა სარალიძისა და მალხაზ მაჩალიკაშვილის მიერ ორგანიზებულ აქციაზე 26 სექტემბერს განვითარებული მოვლენები. ინფორმაციას "რადიო თავისუფლება" ავრცელებს.

„როგორც მედიით გავრცელებული ინფორმაცია ადასტურებს, აქციის მონაწილეები კარვის განთავსებას ტროტუარზე გეგმავდნენ, რაც არ გამოიწვევდა პარლამენტის შენობის ფუნქციონირების შეფერხებასა და ბლოკირებას. პოლიციის თანამშრომლებმა დაშალეს კარვის კონსტრუქცია და აქციის მონაწილეებს არ მისცეს შესაძლებლობა, პროტესტი ამ ფორმით განეგრძოთ. ასევე, ვრცელდება ინფორმაცია, პოლიციის მხრიდან აქციის მონაწილეთა მიმართ ფიზიკური ძალის გამოყენების, კარვის ჩამორთმევის და ავტომანქანის ჩხრეკის შესახებ“ - ნათქვამია 15-ზე მეტი არასამთავრობო ორგანიზაციის ერთობლივ განცხადებაში.

ისინი აღნიშნავენ, რომ იმავე დღეს პოლიციამ სამოქალაქო აქტივისტს, ნატა ფერაძეს და მასთან ერთად მყოფ პირს არ მისცა შესაძლებლობა შეერთებოდნენ აქციას, ძალისმიერი მეთოდებით ჩამოართვეს ჩანთა, რომელშიც კარავი იყო შენახული და აქციის ტერიტორიაზე მათი შეშვება მხოლოდ კარვის ჩამორთმევის შემდეგ გახდა შესაძლებელი.

არასამთავრობო ორგანიზაციები ხაზს უსვამენ, რომ ეს არ არის პირველი შემთხვევა, როცა პოლიცია აქციის მონაწილეებს არ აძლევს მათ მიერ არჩეული მშვიდობიანი ფორმით შეკრების შესაძლებლობას, ასეთი ფაქტი მოხდა 2018 წლის 11 სექტემბერსაც, თუმცა, ამ დრომდე უცნობია შესაბამისი უწყებების მხრიდან მოჰყვა თუ არა სათანადო რეაგირება მშვიდობიანი შეკრების უფლებაში ჩარევას.

საქართველოს შინაგან საქმეთა მინისტრი გიორგი გახარია აცხადებს, რომ სამინისტრო ერთმნიშვნელოვნად იცავს და პატივს სცემს გამოხატვის თავისუფლებას. „აქ ორი აზრი არ არსებობს. ჩვენი მუშაობის სტილით ეს არაერთხელ ავუხსენით და დავუმტკიცეთ საზოგადოებას“ - განუცხადა ჟურნალისტებს გახარიამ.

„როდესაც გვაქვს დასაბუთებული ინფორმაცია, რომ შესაძლებელია მოხდეს გარკვეული პროვოკაციები, რა თქმა უნდა, მართლწესრიგს ვიცავთ იმ ლეგიტიმური საშუალებებით, რომლებიც გაგვაჩნია“ - განაცხადა შინაგან საქმეთა მინისტრმა.

პარლამენტთან აქციებს ზაზა სარალიძე და მალხაზ მაჩალიკაშვილი 10 სექტემბრიდან მართავენ. ისინი ხელისუფლების გადადგომას მოითხოვენ. 

სარალიძის შვილი, დავით სარალიძე ერთ-ერთი იყო 2017 წლის პირველ დეკემბერს ხორავას ქუჩაზე მოკლული ორი არასრულწლოვნიდან. ამ საქმეზე პარლამენტში დროებითი საგამოძიებო კომისია შეიქმნა. საგამოძიებო კომისიის პარალელურად, გამოძიებას ხელახლა აწარმოებს შინაგან საქმეთა სამინისტრო. მკვლელობის საქმეზე ახალი გარემოებების დადგენის მიზნით, გამოძიებას უშუალოდ გიორგი გახარია ხელმძღვანელობს.

მალხაზ მაჩალიკაშვილის 19 წლის ვაჟი, მაჩალიკაშვილი კი სახელმწიფო უსაფრთხოების სამსახურის მიერ პანკისის ხეობაში ჩაატარებული სპეცოპერაციის დროს დაჭრეს. ის 10 იანვარს გარდაიცვალა. გამოძიების ვერსიით, თემირლან მაჩალკაშვილსა და ამ ტერორისტულ დაჯგუფებას შორის კავშირი დადგინდა.

თემირლან მაჩალიკაშვილის მშობლებს და პანკისის უხუცესებს აჰმედ ჩატაევთან და ტერორისტებთან მაჩალიკაშვილის კავშირის არ სჯერათ.