ევროკავშირში თავშესაფრის მაძიებელთა 4%-ს საქართველოს მოქალაქეები შეადგენენ

ევროკავშირის წევრ სახელმწიფოებში 2018 წლის პირველ კვარტალში თავშესაფარი 131 ათასმა ადამიანმა მოითხოვა. ევროსტატის მონაცემებით, ეს გასული წლის ბოლო კვარტლის მაჩვენებელზე 15 პროცენტით ნაკლებია.

იმ პირთა შორის, ვინც 2018 წლის პირველ კვარტალში ევროკავშირში თავშესაფარი მოითხოვეს, 4%-ს საქართველოს მოქალაქეები შეადგენენ. ევროკავშირში თავშესაფრის მაძიებელთა შორის სირიელები ლიდერობენ, მეორე ადგილზე ამ მაჩვენებლით ერაყელები არიან, მესამე პოზიციას კი ავღანელები იკავებენ.

ევროსტატის ოფიციალურ ვებგვერდზე გამოქვეყნებული ინფორმაციის თანახმად, 2017 წლის ბოლო კვარტალში (ოქტომბერი-დეკემბერი) ევროკავშირში საქართველოს 3615-მა  მოქალაქემ მოითხოვა თავშესაფარი, 2018 წლის იანვარი-მარტში კი  4970-მა  (იანვარში – 1730, თებერვალში – 1655, მარტში – 1585).

ევროკავშირში თავშესაფრის მაძიებელთა შორის ყველაზე ბევრი კვლავ სირიელია. იანვრიდან მარტამდე პერიოდში თავშესაფრის თხოვნით ევროკავშირს 15 800-მა სირიელმა მიმართა, რაც საერთო რაოდენობის 12%-ია. მეორე ადგილს ერაყელები იკავებენ (9200– 7%), მესამეს კი ავღანელები (7700 – 6%).

ყველაზე მეტი თავშესაფრის მაძიებელი 2018 წლის პირველ კვარტალში გერმანიაში დარეგისტრირდა. ამ ქვეყანაში თავშესაფარი 34 400-მა მიგრანტმა მოითხოვა, რაც საერთო რაოდენობის 26%-ია. ამ მაჩვენებლით, მეორე ადგილს საფრანგეთი იკავებს 25 300 (19%) განაცხადით, შემდეგ კი იტალია- 17800 (14%).

30%-ით შემცირდა თავშესაფრის მაძიებელთა რიცხვი ავსტრიაში, 25%-ით გერმანიაში, 24%-ით შვედეთში, 22%-ით კი იტალიაში.

ევროსტატის ინფორმაციით, 2018 წლის მარტის მდგომარეობით, ევროკავშირის წევრ სახელმწიფოებში განხილვის პროცესში თავშესაფრის მიღების მსურველთა 892 ათასი განაცხადია.