თეა წულუკიანმა ანა სუბელიანისა და თამაზ ახობაძის სამსახურში არაღდგენის მიზეზები განმარტა

იუსტიციის მინისტრმა თეა წულუკიანმა გადაცემაში „პირისპირ“ იუსტიციის სამინისტროს დანაშაულის პრევენციის ცენტრიდან გათავისუფლებული თანამშრომლების ანა სუბელიანისა და თამაზ ახობაძის არაღდგენის მიზეზები განმარტა. სუბელიანი და ახობაძე მინისტრის გადადგომას ითხოვენ და ამ მიზნით საპროტესტო აქციებსაც აწყობენ. 

წულუკიანის თქმით, როგორც მას აღსრულების ეროვნული ბიუროდან აქვს უტყუარი ინფორმაცია, როდესაც ახობაძის აღდგენაზე დაიწყეს მუშაობა, ადამიანმა, რომელმაც ახობაძე ამ პოსტზე ჩაანაცვლა იჩივლა და სასამართლო გადაწყვეტილება, რომლის მიხედვითაც ახობაძემ სამივე ინსტანცია მოიგო გაბათილდა და ამ ორ ადამიანს შორის ახლა სამართლებრივი დავა მიმდინარეობს.

"ერთ პოზიციაზე ორი ადამიანი ვერ დასაქმდება. შესაბამისად, სიცრუეა, თითქოს არსებობს აღსასრულებელი გადაწყვეტილება და ის არ სრულდება. მაგრამ მე არაფერი მიკვირს იმ ადამიანებისგან, რომლებმაც აღსრულების ეროვნულ ბიუროში თქვეს, რომ თუ ჩვენ ბოდიშს მოგვიხდით და სასამართლოს მიერ დაკისრებული განაცდურზე კიდევ 12 ათასს ლარს დაგვიმატებთ, საქმე მოგვარებულად ჩაითვლებაო. სასამართლოს გადაწყვეტილებაში წერია აღგენა და განაცდური, მათ მოითხოვეს, რომ დაგვიმატეთ კიდევ ფული ზემოდან და მოიხადეთ ბოდიში. აღსრულების ეროვნული ბიურო არ არის ქუჩა, რომ მოიხადე ბიჭო ბოდიში ეძახოს ვინმემ. აქ სახელმწიფოა, ამიტომაც ეროვნულ ბიუროში შეწყდა მათთან მუშაობა და როდესაც იმ ერთ პოზიციაზე მომუშავე ადამიანმა მოითხოვა ბათილობა ეს მოთხოვნა დაკმაყოფილდა და მიმდინარეობს დავა,"- თქვა წულუკიანმა.

იუსტიციის მინისტრმა ანა სუბელიანის საქმეზეც დეტალურად ილაპარაკა.

"რაც შეეხება სუბელიანს, სამწუხაროდ სასამართლომ გამოსცა გადაწყვეტილება, რომ ის აღგენილიყო იმ თანამდებობაზე, მედიაციის სახლის უფროსად, რომელიც არასდროს არსებობდა და სუბელიანი ამ თანამდებობიდან არ გათავისუფლებულა. შესაბამისად, ჩვენ აღსრულების ფურცელი დავაბრუნეთ და ამ დაბრუნების გადაწყვეტილების შესახებ სუბელიანი სასამართლო დავას აწარმოებს, შესაბამისად, ორივე საქმეზე სასამართლო დავები მიმდინარეობს, ამიტომ პოლიტიკური აჟოოტაჟი ჩემთვის გაუგებარი და დროის ხარჯვაა," - განმარტა წულუკიანმა.

2014 წელს ანა სუბელიანი და თამაზ ახობაძე იუსტიციის სამინისტროს დანაშაულის პრევენციის ცენტრიდან გაათავისუფლეს. დათხოვნა ოფიციალურად რეორგანიზაციის მექანიზმის გამოყენებით მოხდა. თუმცა, როგორც ისინი ამბობენ, რეალური მიზეზი თანამშრომლების მიერ დანაშაულის პრევენციის ცენტრის ხელმძღვანელის გათავისუფლებასთან დაკავშირებით სოციალურ ქსელში განთავსებული პოსტები იყო.

მედიაციის სახლის მენეჯერის, ანა სუბელიანისა, და განრიდებისა და მედიაციის პროგრამის მენეჯერის, თამაზ ახობაძის, ინიციატივით საქმის წარმოება სასამართლოში დაიწყო - მომჩივანებმა საქმე იუსტიციის მინისტრის წინააღმდეგ სამივე ინსტანციაში მოიგეს. სააპელაციო სასამართლომ 2017 წლის 9 მარტს სრულად დააკმაყოფილა ანა სუბელიანისა და თამაზ ახობაძის სარჩელი. იუსტიციის სამინისტროს დანაშაულის პრევენციის ცენტრს დაზარალებულთათვის იძულებითი განაცდურის ანაზღაურება დაეკისრა. სასამართლომ უკანანოდ და ბათილად ცნო სამსახურიდან გათავისუფლების ბრძანებები.

2017 წლის დეკემბერში აღსრულების ეროვნულ ბიუროს ოფიციალური სააღსრულებლო ფურცელი ჩაბარდა, თუმცა მომჩივანთა თქმით, გადაწყვეტილება დღემდე აღსრულებული არ არის.