წულუკიანი: ის ხალხი კი, ვინც გარეთ გვისტვენს, ნიჩბით ყრიდა ბავშვებს ციხეში

ეროვნული ბიბლიოთეკის შენობასთან საპროტესტო აქციის გამო არანაირ დისკომფორტს არ ვგრძნობ, - ამის შესახებ ჟურნალისტებთან საუბარში იუსტიციის მინისტრმა, თეა წულუკიანმა განაცხადა.

კითხვაზე, ხომ არ უქმნიან საპროტესტო აქციის მონაწილეები მას დისკომფროტს, წულუკიანმა აღნიშნა, რომ არამც თუ რამე დისკომფორტი არ არსებობს, არამედ ისიც და ღონისძიებაზე მყოფი ევროკავშირისა და UNICEF-ის წარმომადგენლები ასეთ ფონსა და რეკლამას ვერც კი ინატრებდნენ.

„ჩვენ დღეს ვზეიმობთ საქართველოში გაეროს ბავშვთა უფლებების კონვენციის 30-ე წლისთავს და ის ხალხი კი, ვინც გარეთ სტვენს, ნიჩბით ყრიდა ბავშვებს ციხეში. ეს ფონი სიმბოლურია, მადლობა მათ ამისთვის, ვინაიდან საზოგადოებამ დღეს კიდევ ერთხელ დაინახა ამ ადამიანების სახე. ხელისუფლებაში მათი ყოფნის დროს არ არსებობდა არასრულწლოვანთა მართლმსაჯულების კოდექსი და ფეხქვეშ ითელებოდა გაეროს ბავშვთა უფლებების კონვენცია. დღეს ჩვენ დავაანონსეთ, რომ #11 არასრულწლოვანთა დაწესებულებაში, რომელიც 100 ადამიანზეა გათვლილი და გარეთ შეკრებილი ადამიანების ხელისუფლებაში ყოფნისას გადავსებული იყო, ახლა მხოლოდ 23 ბავშვი იმყოფება“, - განაცხადა წულუკიანმა.

დილით მოძრაობა „შეცვალეს“ წევრებმა პარლამენტიდან ეროვნული ბიბლიოთეკისკენ გადაინაცვლეს, სადაც იუსტიციის მინისტრი თეა წულუკიანი კონფერენციას ესწრებოდა. აქციაზე პოლიციასა და პროტესტის მონაწილეებს შორის გარკვეული დაპირისპირებაც მოხდა. „ევროპული საქართველოს“ ერთ-ერთმა ლიდერმა, დეპუტატმა გიგა ბოკერიამ პოლიციის კორდონის გარღვევა სცადა, თუმცა სამართალდამცველებმა მას ამის საშუალება არ მისცეს. ინციდენტის დროს სავარაუდოდ რამდენიმე ადამიანი დააკავეს. მათ შორის პოლიციამ ტერიტორიიდან გაიყვანა გიგი უგულავა, გიორგი კანდელაკი, დავით ნაფეტვარიძე და ლაშა ჩხარტიშვილი.

პროპორციულ საარჩევნო სისტემაზე გადასვლის შესახებ საკონსტიტუციო ცვლილებების პროექტის ჩავარდნის შემდეგ ოპოზიცია პარლამენტთან და სხვა საჯარო უწყებებთან საპროტესტო აქციებს მართავს. ოპოზიცია არჩევნების „გერმანული მოდელით“ ჩატარებას ითხოვს, რისთვისაც სპეციალური კანონპროექტი შეიმუშავა.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. მათ შორის იყო მარიამ ჯაშიც.

მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.