თეა წულუკიანი: შოთაძის წასვლა შეცდომა იყო, მის დაბრუნებას მივესალმები

„ირაკლი შოთაძის წასვლა იყო შეცდომა. შესაბამისად, ვერავითარ პრობლემას ვერ ვხედავ იმაში, რომ ადამიანი, რომლის წასვლაც შეცდომა იყო, თუკი მას მხარდაჭერა ექნება, დაბრუნდეს. მე ამას მხოლოდ მივესალმები“, - ამის შესახებ იუსტიციის მინისტრმა, თეა წულუკიანმა ჟურნალისტებს მთავრობის სხდომის დასრულების შემდეგ განუცხადა. მისი თქმით, ირაკლი შოთაძე არ უნდა გადამდგარიყო.

„მე წასვლაში კითხვის ნიშანი მქონდა და დღესაც ვფიქრობ, რომ ირაკლი შოთაძე არ უნდა გადამდგარიყო, რადგან, როდესაც სისხლის სამართლის გამოძიებაზე, კონკრეტულ საქმეზე ჩნდება კითხვები, ან საზოგადოებას აქვს განცდა, რომ პროკურატურას რომელიღაც ბრალდებული არ უნდა გამართლებოდა სასამართლოში ან რომელიმე ბავშვისთვის, ხაზს ვუსვამ ბავშვისთვის მისჯილი სასჯელი არ არის საკმაოდ პირსისხლიანი, ამიტომ არ უნდა გადადგეს მთავარი პროკურორი. მისი გადაგომა იყო შეცდომა. ეს ხმამაღლა ვთქვი. მე ვესწრებოდი ამ პროცესს, როდესაც ვთხოვე, რომ ეს გადაწყვეტილება არ მიეღო. რა თქმა უნდა, რთული იყო, მაგრამ ღირსეული ნაბიჯი, თუმცა დღეს ამას უფრო მკაცრად ვაფასებ და ვამბობ, რომ მისი წასვლა იყო შეცდომა, შესაბამისად, ვერავითარ პრობლემას ვერ ვხედავ იმაში, რომ ადამიანი, რომლის წასვლაც შეცდომა იყო, თუკი მას მხარდაჭერა ექნება, დაბრუნდეს. მე ამას მხოლოდ მივესალმები“, - განაცხადა თეა წულუკიანმა.

იუსტიციის მინისტრის თქმით, დღეს, თანმიმდევრული რეფორმების წყალობით დამოუკიდებელი პროკურატურა გვაქვს, რომელიც დღეს ოპოზიციას არ მოსწონს, რაც გვაფიქრებინებს იმას, რომ მათი ხელისუფლებაში დაბრუნება არ შეიძლება.

„პროკურატურა, სასამართლო და იუსტიციის მინისტრი ფარსი იყო სწორედ მათი ხელისუფლების პირობებში. მაშინ, როდესაც იუსტიციის მინისტრი იყო გენერალური პროკურორი. იმავდროულად, შემდეგ ქუდს შემოიტრიალებდა და იყო მოსამართლეების უფროსიც და ა.შ. ეს იყო მთელი ფარსი. მართლაც, როდესაც სისხლის მართლმსაჯულება არ ხორციელდებოდა ამ ქვეყანაში. დღეს თანმიმდევრული რეფორმების წყალობით ჩვენ გვაქვს დამოუკიდებელი პროკურატურა, რომელიც, თურმე, დღეს ოპოზიციას არ მოსწონს და ეს კიდევ ერთხელ გვაფიქრებინებს იმას, რომ უბრალოდ მათი ხელისუფლებაში დაბრუნება არ შეიძლება, რადგან როდესაც ადამიანი აცხადებს, რომ არ მოგწონს დამოუკიდებელი პროკურატურა, ეს ნიშნავს იმას, რომ თუკი ხელისუფლებაში აღმოჩნდები, ისევ დაბრუნდები უკან, რომელი წარსულიდანაც ძლივს ნელ-ნელა გამოვდივართ. შესაბამისად, არავითარი ფარსი ამჟამად არ მიმდინარეობს. მიმდინარეობს საპროკურორო საბჭოსთვის, რასაც მე საჯარო ინტერვიუებით თვალყურს ვადევნებ, დამღლელი და კომპლექსური პროცესი ინტერვიუებისა, რის შემდეგაც კენჭი ეყრება თითოეულ კანდიდატს და ვნახოთ, რა შემადგენლობა წარედგინება პარლამენტს“, - განაცხადა თეა წულუკიანმა.

საპროკურორო საბჭო დღეს გენერალური პროკურორობის 15 კანდიდატიდან სამს ფარული წესით აირჩევს.

საქართველოს გენერალური პროკურორის თანამდებობა ვაკანტური მას შემდეგ გახდა, რაც პარლამენტმა შალვა თადუმაძე საქართველოს უზენაესი სასამართლოს მოსამართლედ აირჩია.

გენერალური პროკურორობის კანდიდატების სიის ნახვა შეგიძლიათ ამ ბმულზე.