თეა წულუკიანი: ბოლო 8 წლის განმავლობაში, ჩვენ გავატარეთ ყველა ის ფუნდამენტური რეფორმა, რომელმაც ჩვენს მოქალაქეებს უფრო მეტი თავისუფლება მისცა

ბოლო 8 წლის განმავლობაში, ჩვენ გავატარეთ ყველა ის ფუნდამენტური რეფორმა, რომელმაც ჩვენს მოქალაქეებს უფრო მეტი თავისუფლება და ინსტიტუციური დემოკრატია მისცა, - განაცხადა იუსტიციის მინისტრმა, თეა წულუკიანმა უწყების 8-წლიანი მუშაობის ანგარიშის პრეზენტაციისას.

„გავატარეთ რეფორმები, რომელთაც ევროკავშირთან უვიზო მიმოსვლის რეჟიმის შემოღებასა და ასოცირების ხელშეკრულების ხელმოწერას შეუწყო ხელი. პირველ რიგში, გატარდა სასამართლოს საკანონმდებლო რეფორმა, მოხდა იუსტიციის უმაღლესი საბჭოს დეპოლიტიზაცია და მასში წევრობა შეუწყდათ პოლიტიკური პარტიების წარმომადგენლებს. მოსამართლე გახდა მაქსიმალურად დაცული გარე ზეწოლისგან. მოსამართლეს პირველად მიეცა შესაძლებლობა, რომ საკუთარი ან თავისი კოლეგის კანდიდატურა დაეყენებინა იუსტიციის უმაღლესი საბჭოს წევრის თანამდებობაზე, მაშინ, როცა ამ უფლებით ექსკლუზიურად სარგებლობდა უზენაესი სასამართლოს თავმჯდომარე. კენჭისყრა გახდა ფარული, დაიხვეწა მოსამართლის დისციპლინური დევნის პროცედურები, სასამართლო დარბაზებში დაშვებული იქნა მედია და სატელევიზიო კამერები. პირველად ჩვენს ქვეყანაში, შემოღებულ იქნა მოსამართლის შეფასების ინსტიტუტი. გატარდა რეფორმა მოსამართლის, აგრეთვე, შიდა ზეწოლისგან დასაცავად. წესად დადგინდა მოსამართლის თანამდებობაზე მხოლოდ კონკურსით დანიშვნა. შემოღებულ იქნა სასამართლოში შესული საქმეების ავტომატურად, შემთხვევითობის პრინციპით განაწილება და ამით, ე.წ. „ჯიბის მოსამართლის“ ინსტიტუტი აღმოიფხვრა. სასამართლოს თავმჯდომარეებს გაუჩნდათ ვალდებულება, თავადაც განიხილონ საქმეები და აღარ აქვთ უფლება, რომ, საკუთარი სასამართლოს მოსამართლეების წინააღმდეგ, დისციპლინური დევნა დაიწყონ. ამით აღმოიფხვრა რაიონული სასამართლოების სამინისტროსავით მართვა, ვინაიდან, რაიონული სასამართლო ნამდვილად არაა სამინისტრო, ის ერთმანეთისგან დამოუკიდებლად მომუშავე მოსამართლეთა სამუშაო ადგილია. ამასთან, შემოღებულ იქნა დამოუკიდებელი ინსპექტორის ინსტიტუტი, აიკრძალა მოსამართლის მივლინებაში გაგზავნა მისი თანხმობის გარეშე, რითაც თავიდან ავიცილეთ არასასურველი მოსამართლის საქმისგან ჩამოცილება. გაფართოვდა საკასაციო საჩივრის დაშვების კრიტერიუმები და უზენაესმა სასამართლომ შეიძინა რეალური სასამართლოს როლისა და მოქალაქისთვის უკანასკნელი იმედის ფუნქცია. შემოღებულ იქნა ნოვატორული და ევროპის არაერთი ძირძველი დემოკრატიისთვის მისაბაძი, არასრულწლოვანთა მართლმსაჯულების კოდექსი“ - განაცხადა უწყების პირველმა პირმა.