თეა წულუკიანის თქმით პარლამენტის თავმჯდომარედ მის დანიშვნაზე განხილვები არ გამართულა

ვიცეპრემიერისა და იუსტიციის მინისტრის თეა წულუკიანის განცხადებით, პარლამენტის თავმჯდომარედ მის შესაძლო დანიშვნასთან დაკავშირებით განხილვები არ გამართულა. ამის შესახებ მინისტრმა „იმედის კვირასთან“ ინტერვიუს დროს განაცხადა.

„ეს არის გარკვეული ტიპის ხმები, რომელიც დადის და მეც მსმენია. მაგრამ ამ თემაზე არავითარი განხილვა არც ჩემთან და არც გუნდის შიგნით არ ყოფილა“, - განაცხადა თეა წულუკიანმა.

„იმედის კვირასთან“ ინტერვიუში თეა წულუკიანი ისტორიულ საკანონმდებლო ცვლილებებად აფასებს არასრულწლოვანთა მართლმსაჯულების კოდექსსა და მართლმსაჯულების რეფორმის სამ ტალღას.

„როდესაც გარკვეული დრო გავა, დარწმუნებული ვარ, რასაც დღეს ევროპა დადებითად აფასებს, კიდევ უფრო დადებითად შეაფასებს შედეგებს ჩვენი საზოგადოება“, - თქვა მინისტრმა.

რაც შეეხება სასჯელაღსრულების დაწესებულებებში ე.წ. მაყურებლების თემას, ამაზე მინისტრი ამბობს, რომ არიან პატიმრები, რომლებიც ყოველთვის და სისტემატურად ცდილობენ გავლენა მოახდინონ, დაიმორჩილონ სხვა პატიმარი. „მაგრამ მე შემიძლია სრული პასუხისმგებლობით გითხრათ, რომ იმ ზომებმა, რასაც ჩვენ ვახორციელებთ, და სამწუხაროდ არც კი მოხვდა სახალხო დამცველის ანგარიშში, კერძოდ, 46 ასეთი პატიმარი შარშან დახურულ დაწესებულებაში გადავიყვანეთ, უფრო მეტიც, სისხლის სამართლებრივ პასუხისმგებაში მივეცით“, - განაცხადა იუსტიციის მინისტრმა.