თეა წულუკიანი: პენიტენციური სისტემის მიზანი პატიმრების გარდა თანამშრომლებზე ზრუნვაც იქნება

პარლამენტში დეპუტატები იუსტიციის მინისტრობის კანდიდატს, თეა წულუკიანს უსმენენ. როგორც წულუკიანმა განაცხადა, იუსტიციის სამინისტრო გააგრძელებს მუშაობას, რათა ევროკავშირთან უვიზო მიმოსვლა შენარჩუნდეს: "ჩვენ საკმაოდ დიდი როლი გვაკისრია საგარეო საქმეთა სამინისტროს, საზღვრის მართვის სტრუქტურებთან და ჩვენს პოლიციასთან ერთად და, რა თქმა უნდა, ამ თანამშრომლობის რეჟიმში დავრჩებით", - განაცხადა თეა წულუკიანმა.

წულუკიანმა ასევე ხაზი გაუსვა პენიტენციურ სისტემაში განხორციელებულ და დაგეგმილ სიახლეებს. მისი თქმით, პენიტენციური სისტემის მიზანი მხოლოდ პატიმრებზე ზრუნვა კი არა, არამედ პირველ რიგში თანამშრომლებზე ზრუნვა იქნება. მისი თქმით, პენიტენციურ სისტემაში იყო პოზიციები, სადაც ხელფასი 600 ლარიდან 1200 ლარამდე გაზარდა უწყებამ

"რადგან 600 ლარი, რომელიც შემდეგ იბეგრება, საკმაოდ მცირე თანხაა იმისთვის, ადამიანს მოსთხოვო პატიმარი უსაფრთხოდ გადაიყვანოს. იყო პოზიციები, სადაც ხელფასი უფრო მეტი იყო და ჩვენ ეს გავათანაბრეთ. საშუალოდ გეტყვით, რომ შარშანდელი წლიდან დღემდე 270 ლარით გაიზარდა ესკორტის ოფიცრის ხელფასი. გვინდა, რომ სხვა ძალოვან სტრუქტურებთან ერთად, ეს ტენდენცია გაგრძელდეს, რადგან ჩვენს ესკორტის ოფიცრებს, პოლიციელებს, ჯარისკაცებს უფრო მეტი ხელფასი ეკუთვნით", - განაცხადა მინისტრობის კანდიდატმა.

ასევე მინისტრობის კანდიდატის განცხადებით, იმისთვის, რომ ციხეებში გარე პერიმეტრი და უსაფრთხოება დაცული იყოს, 15 პენიტენციურ დაწესებულებისთვის უწყებას სჭირდება დაახლოებით 1500 წვევამდელი, დღეს კი 411 წვევამდელი ჰყავს. 

"ჩვენი მიზანია, რომ სრულად ან ეტაპობრივად გადავიდეთ საკონტრაქტო სამსახურზე. ეს მოითხოვს თანხებს. ჩვენ შეგვიძლია, თუ ნოემბრის საბიუჯეტო კანონი და თქვენი მხარდაჭერა იქნებოდა და ამის საშუალებას მოგვცემდა, მთლიანად გადავიდეთ გაისად საკონტრაქტო სამსახურზე ან ორ დაწესებულებაში მაინც", - განაცხადა მინისტრობის კანდიდატმა.

თეა წულუკიანმა ასევე ისაუბრა საკანონმდებლო საქმიანობის მიმართულებით იუსტიციის სამინისტროს გეგმებზე და თქვა, რომ უწყება პარლამენტს არაერთ მნიშვნელოვან პაკეტს წარუდგენს, მათ შორის უახლოეს პერიოდში სამინისტრო გადახდისუუნარობის სისტემის რეფორმის შესახებ ცვლილებათა პაკეტის წარდგენას გეგმავს. 

თეა წულუკიანს პარლამენტში ოთხი კომიტეტის გაერთიანებულ სხდომაზე უსმენენ. 

6 სექტემბერს მთავრობის ახალი შემადგენლობის მოსმენა ფრაქციების ფორმატში გადაინაცვლებს, 8 სექტემბერს კი პლენარული სხდომა გაიმართება, სადაც მთავრობის ახალ მეთაურსა და მინისტრთა კაბინეტს დაამტკიცებენ.

პრემიერმინისტრის პოსტზე გიორგი გახარიას კანდიდატურა 3 სექტემბერს, პოლიტსაბჭოს სხდომის დასრულების შემდეგ პარტიის თავმჯდომარემ ბიძინა ივანიშვილმა წარადგინა. საქართველოს შინაგან საქმეთა მინისტრად ვახტანგ გომელაური, თავდაცვის მინისტრად კი ირაკლი ღარიბაშვილი არიან წარდგენილი. 

რაც შეეხება თავდაცვის ყოფილ მინისტრ ლევან იზორიას, ის უსაფრთხოების საბჭოს მდივნის თანამდებობაზე დასახელდა.