ირაკლი ღარიბაშვილი: უნდა ვაწარმოოთ ყველა სახის იარაღი ბირთვულის გარდა

საქართველოს თავდაცვის მინისტრობის კანდიდატის ირაკლი ღარიბაშვილის განცხადებით, მას ჰქონდა პროექტი ტყვიის საწარმოს მშენებლობის შესახებ, რომელიც აუცილებლად უნდა განხორციელდეს. ამის შესახებ მან პარლამენტში, ოთხი კომიტეტის გაერთიანებულ სხდომაზე განაცხადა, სადაც მინისტრობის კანდიდატებს უსმენენ.

ირაკლი ღარიბაშვილის თქმით, საქართველოს უდიდესი გამოწვევა ოკუპაციაა და ამის ფონზე მნიშვნელოვანია რომ ქართული ჯარი ძლიერი იყოს: 

"რა თქმა უნდა არ ვგულისხმობ იმას, რომ ჩვენი ჯარის გაძლიერება ვინმეს ან რამეს წინააღმდეგაა მიმართული, არამედ ჩემი სურვილი - სამხედრო მრეწველობის განვითარება, ერთ-ერთი მთავარი პრიორიტეტია. ყოველწლიურად მხოლოდ თავდაცვის სამინისტრო რამდენიმე ათეულ მილიონს შეიძლება ხარჯავდეს, ისევე როგორც სხვა სამინისტროები - შსს თუ სხვა თუნდაც ტყვია-წამლის შეძენაში, რაც ერთ-ერთი მთავარი პრობლემაა. ჩემი ჯერ კიდევ მინისტრობის და შემდეგ პრემიერმინისტრობის დროს, მქონდა ერთ-ერთი მთავარი პროექტი - ტყვიის საწარმოს მშენებლობა საქართველოში. ვფიქრობ, რომ ეს უნდა გავაკეთოთ ჩვენ და უნდა დავიწყოთ დღესვე, რა თქმა უნდა, ყველა სახის იარაღის წარმოება, გარდა ბირთვულის", - განაცხადა ირაკლი ღარიბაშვილმა.

მისივე თქმით, თავდაცვის უწყება მისი მინისტრობის დროს კიდევ უფრო მეტს გააკეთებს, რათა საქართველოს თავდაცვის ძალები კიდევ უფრო გაძლიერდეს. ღარიბაშვილმა თავდაცვის ყოფილ მინისტრს ლევან იზორიას მადლობა გადაუხადა "ძალიან ნაყოფიერი მუშაობისთვის, რომელიც გასწია თითქმის სამი წლის განმავლობაში თავდაცვის სამინისტროში“. მომავალმა მინისტრმა ყოფილ კოლეგას და მის გუნდს წარმატება უსურვა. „რაც მოვისმინე, ძალიან ბევრი გააკეთა ამ სამინისტროში", - თქვა ღარიბაშვილმა.

თავდაცვის მინისტრობის კანდიდატმა ასევე განაცხადა, რომ ქართული  ჯარი რაც შეიძლება მეტად უნდა დაუახლოვდეს ნატოს სტანდარტებს. 

მინისტრობის კანდიდატმა მოგვიანებით ასევე თქვა, რომ ის სამხედრო თვითმფრინავების წარმოების აღდგენას გეგმავს: "დღესაც არსებობს ე.წ. 31-ე ქარხანა, სადაც ჩვენ ვუშვებდთ სამხედრო თვითმფრინავებს. საბედნიეროდ, ქვეყანაში ჯერ კიდევ გვაქვს ინტელექტუალური რესურსი. ის ადამიანები, რომლებიც მუშაობდნენ ამ უნიკალური მაღალტექნოლოგიური პროდუქციის შექმნაზე, ჯერ კიდევ ცხოვრობენ ქვეყანაში. მე ვაპირებ ამ საკითხის დასმას მთავრობის შემადგენლობაში. ჩვენ უნდა გამოვიყენოთ ეს უნიკალური შესაძლებლობა, ეს შანსი, რომ აღვდგინოთ სამხედრო თვითმფრინავების წარმოება", - განაცხადა ღარიბაშვილმა. 

პარლამენტში უკვე მოუსმინეს თეა წულუკიანს და ვახტანგ გომელაურს. 

6 სექტემბერს მთავრობის ახალი შემადგენლობის მოსმენა ფრაქციების ფორმატში გადაინაცვლებს, 8 სექტემბერს კი პლენარული სხდომა გაიმართება, სადაც მთავრობის ახალ მეთაურსა და მინისტრთა კაბინეტს დაამტკიცებენ.

პრემიერმინისტრის პოსტზე გიორგი გახარიას კანდიდატურა 3 სექტემბერს, პოლიტსაბჭოს სხდომის დასრულების შემდეგ პარტიის თავმჯდომარემ ბიძინა ივანიშვილმა წარადგინა. საქართველოს შინაგან საქმეთა მინისტრად ვახტანგ გომელაური, თავდაცვის მინისტრად კი ირაკლი ღარიბაშვილი არიან წარდგენილი. 

რაც შეეხება თავდაცვის ყოფილ მინისტრ ლევან იზორიას, ის უსაფრთხოების საბჭოს მდივნის თანამდებობაზე დასახელდა.