თეა წულუკიანი: რეფორმის შედეგად მოსახლეობას გაუჩნდა უფრო მეტი ნდობა, რამაც 8-ჯერ შეამცირა სტრასბურგის სასამართლოში გაგზავნილი საჩივრების ოდენობა

სასამართლო რეფორმის შემდეგ მოსახლეობას გაუჩნდა მართლმსაჯულებისადმი უფრო მეტი ნდობა, რამაც 8-ჯერ შეამცირა სტრასბურგის სასამართლოში საქართველოდან გაგზავნილი საჩივრების ოდენობა, - ამის შესახებ იუსტიციის სამინისტროში 8-წლიანი მუშაობის შეჯამებისას მინისტრმა, თეა წულუკიანმა განაცხადა.

„ჩვენ ვენდობით არა ჩვენივე შეფასებებს, არამედ მსოფლიოს კვლევის გიგანტებს, როგორიც არის IPSOS France, რომელმაც 2018 წელს შემდეგი შეფასება დადო: სასამართლო რეფორმის სამი ტალღის შედეგად საქართველოს მოსახლეობის 55% თვლის, რომ სასამართლო ჩვენს ქვეყანაში უფრო სამართლიანია. 52% ამბობს, რომ სასამართლო ამ რეფორმების წყალობით უფრო სანდო გახდა, ხოლო 51% მიიჩნევს, რომ მოსამართლეები და სასამართლო უფრო დამოუკიდებლები გახდნენ. 2004-2012 წლებში საქართველოს ეს მაჩვენებლები უბრალოდ არ ჰქონდა. ეს შედეგი გვაქვს ახლა და ის სრულად ემთხვევა საშუალო ევროპულ მაჩვენებელს. ეს შედეგები აჩვენებს ერთ მარტივ რამეს - რეფორმა უნდა გაგრძელდეს, თუ გვინდა, რომ კიდევ უკეთესი შედეგები გვქონდეს“, - განაცხადა მინისტრმა.

მისივე თქმით, მოცემული რეფორმის შემდეგ მოსახლეობას გაუჩნდა მართლმსაჯულებისადმი უფრო მეტი ნდობა, რამაც 8-ჯერ შეამცირა სტრასბურგის სასამართლოში საქართველოდან გაგზავნილი საჩივრების ოდენობა.

„მიუხედავად სასამართლოში გატარებული ამ რეფორმებისა, მე მაინც მწამს, რომ დავის გადაჭრისათვის არსებობს უკეთესი გზა - არბიტრაჟი და მედიაცია. ამ გზებს უწოდებენ სასამართლოს ალტერნატივებს, მე კი მგონია, რომ ყველაფერი პირიქითაა. სასამართლო არის არბიტრაჟისა და მედიაციის ალტერნატივა, მითუმეტეს საქართველოში, სადაც მედიაციის ძირძველი ტრადიციები გვაქვს. ამიტომაც ჩვენ ჩავუდექით სათავეში მედიაციის აღორძინებას, შევქმენით მედიატორთა ასოციაცია, რომელიც დიდი მომავლის მქონე ორგანიზაციაა. 2015 წელს ბიზნესს შევთავაზეთ არბიტრაჟის საკანონმდებლო რეფორმა, რამაც შემდეგ შესაძლებელი გახადა, საქართველოს ხელი მოეწერა მემორანდუმისთვის ისეთ მსოფლიო ინსტიტუტთან თანამშრომლობის შესახებ, როგორიცაა საერთაშორისო სასამართლო პარიზში. ჩვენ ხელი მოვაწერეთ მედიაციის შესახებ სინგაპურის კონვენციას, განვავითარეთ სანოტარო მედიაცია ისე, რომ 2000-მდე დავა ბოლო 4 წელიწადში მედიაციის გზით მოგვარდა და აღარ წავიდა სასამართლოში. რეფორმამდე წარმატებული მედიაციების რიცხვი მხოლოდ 4-ს შეადგენდა“, - განაცხადა წულუკიანმა.