პოლიციამ აქციიდან გიგი უგულავა, გიორგი კანდელაკი, დავით ნაფეტვარიძე და ლაშა ჩხარტიშვილი გაიყვანა

მოძრაობა „შეცვალეს“ წევრებმა პარლამენტიდან ეროვნული ბიბლიოთეკისკენ გადაინაცვლეს, სადაც იუსტიციის მინისტრი თეა წულუკიანი იმყოფება. მათი განცხადებით, განაგრძობენ წერტილოვან დარტყმებს ყველა იმ ადგილზე, სადაც ხელისუფლების წარმომადგენლები იმყოფებიან. 

აქციაზე პოლიციასა და პროტესტის მონაწილეებს შორის გარკვეული დაპირისპირებაც მოხდა. „ევროპული საქართველოს“ ერთ-ერთმა ლიდერმა, დეპუტატმა გიგა ბოკერიამ პოლიციის კორდონის გარღვევა სცადა, თუმცა სამართალდამცველებმა მას ამის საშუალება არ მისცეს. ინციდენტის დროს სავარაუდოდ რამდენიმე ადამიანი დააკავეს. მათ შორის პოლიციამ ტერიტორიიდან გაიყვანა გიგი უგულავა, გიორგი კანდელაკი, დავით ნაფეტვარიძე და ლაშა ჩხარტიშვილი.

„აქციის მონაწილეებმა აქ გადმოინაცვლეს და ცდილობენ შესასვლელის ბლოკირებას. შესაბამისად, სამართალდამცველები მობილიზებულები არიან, დგას პოლიციის კორდონი და ყველას მოვუწოდებთ, რომ მშვიდ ვითარებაში გამოხატონ პროტესტი. ამდენი ხალხი ბიბლიოთეკაში, ბუნებრივია, ვერ შევა. აქციის მონაწილეები ვერ განახორციელებენ ისეთ ქმედებებს, რომლების სხვა ღონისძიების ჩაშლაზეა მიმართული“, - განაცხადა საპატრულო პოლიციის უფროსმა ვაჟა სირაძემ.

პროპორციულ საარჩევნო სისტემაზე გადასვლის შესახებ საკონსტიტუციო ცვლილებების პროექტის ჩავარდნის შემდეგ ოპოზიცია პარლამენტთან და სხვა საჯარო უწყებებთან საპროტესტო აქციებს მართავს. ოპოზიცია არჩევნების „გერმანული მოდელით“ ჩატარებას ითხოვს, რისთვისაც სპეციალური კანონპროექტი შეიმუშავა.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. მათ შორის იყო მარიამ ჯაშიც.

მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.