IDFI: საქართველოში ელიტურ კორუფციასთან ბრძოლა კვლავ გამოწვევად რჩება

სოსო გოგაშვილი, დიმიტრი ქუმსიშვილი, ზურაბ ალავიძე და ოთარ ფარცხალაძე - ყოფილი მაღალჩინოსნები IDFI-ს ანგარიშში მოხვდნენ. ანგარიშში ორგანიზაცია კორუფციის რისკებზე წერს და სახელმწიფოსგან ეფექტიან ღონისძიებებს მოითხოვს.

IDFI -ს ინფორმაციით, საქართველოში ელიტურ კორუფციასთან ბრძოლა კვლავ გამოწვევად რჩება. ორგანიზაციის ცნობით, უკანასკნელი თვეების განმავლობაში აქტიურად ვრცელდება ინფორმაცია ისეთი შემთხვევების შესახებ, რომლებშიც მონაწილეობენ მოქმედი და ყოფილი თანამდებობის პირები და რომლებიც მიანიშნებენ შესაძლო კორუფციის შემთხვევებზე.

როგორც ორგანიზაციაში ამბობენ, ბოლო წლებში, მედიის და არასამთავრობო ორგანიზაციების მიერ გამოვლინდა არაერთი შემთხვევა, სადაც შესაძლო კორუფციის შემთხვევები დამატებით გამოკვლევას საჭიროებდა. თუმცა, მათ ან არ მოჰყოლია შედეგი ან არ მოხდა საზოგადოების ჯეროვნად ინფორმირება გამოძიების მიმდინარეობის ან შედეგების შესახებ, რამაც შეარყია საზოგადოების ნდობა სამართალდამცავი და საგამოძიებო სისტემის მიმართ. ეს ფაქტები მოიცავენ როგორც შესაძლო კორუფციის, ისე თანამდებობის ბოროტად გამოყენების და სამოხელეო დანაშაულის სხვა შემთხვევებსაც.

„როგორც წინა, ისე მოქმედი ხელისუფლების პირობებში “ელიტური კორუფციის” შემთხვევების გამოუძიებლობა კიდევ უფრო ნათლად მიუთითებს იმაზე, რომ აუცილებელია არსებული სისტემის რეფორმირება, რადგან ის ვერ ახდენს მაღალი დონის კორუფციის შემთხვევებზე ეფექტურ რეაგირებას, რაც საზოგადოებაში აჩენს შეკითხვებს და ნეგატიურად აისახება საჯარო დაწესებულებების მიმართ საზოგადოების ნდობაზე. მეტიც, შესაძლო სამოხელეო დანაშაულის გამოუძიებელი შემთხვევები უფრო მეტად ახალისებს სამოხელეო დანაშაულს და ზიანს აყენებს ქვეყნის დემოკრატიულ განვითარებას“, – აცხადებს IDFI და საქართველოს პარლამენტს მოუწოდებს, დაიწყოს მუშაობა დამოუკიდებელი ანტიკორუფციული სამსახურის შექმნის მიმართულებით და ხელახლა განიხილოს „საერთაშორისო გამჭვირვალობა - საქართველოს“ მიერ ამ მიმართულებით ინიცირებული კანონპროექტი.

სხვადასხვა უწყებაში კორუფციასთან დაკავშირებით, „საერთაშორისო გამჭვირვალობა - საქართველომ“ ჯერ კიდევ 2014 წელს დაიწყო საუბარი, თუმცა როგორც დღეს არასამთავრობო ორგანიზაციები აცხადებენ, ამ კუთხით არაფერი შეცვლილია და კორუფციის წინააღმდეგ ბრძოლა სუსის ფუნქციად განისაზღვრა, რაც მათი აზრით არაეფექტიანი აღმოჩნდა.