გრიგოლ ვაშაძე 100 ათასი კაცის ქუჩაში გამოყვანით იმუქრება

„გრიგოლ ვაშაძე, რომელიც საქართველოს საპრეზიდენტო არჩევნების მეორე ტურში გავიდა, მოითხოვდა, რომ მასთან ინტერვიუ ინგლისურ ენაზე ჩაგვეწერა, თუმცა ის 2008 წლამდე რუსეთის, მანამდე კი საბჭოთა კავშირის მოქალაქე იყო. ამასთან, ის საბჭოთა საგარეო საქმეთა სამინისტროს საკადრო დიპლომატი იყო."- ამის შესახებ Deutsche Welle წერს. 

გერმანულმა სააგენტომ „ნაციონალური მოძრაობის“ პრეზიდენტობის კანდიდატს ინტერვიუ ჩამოართვა. ჟურნალისტმა გრიგოლ ვაშაძეს რუსეთის მოქალაქეობაზე უარის თქმის დეტალების მოყოლა სთხოვა.

„სინამდვილეში, 1 პასპორტი მქონდა: მხოლოდ რუსული. მოსკოვში 1976-დან 1993 წლამდე ვცხოვრობდი. 2004 წელს მე საქართველოში დავბრუნდი. მას შემდეგ კი, რაც რუსეთმა საქართველოსთან ომო დაიწყო, ჩემი პასპორტი მედვედევს გავუგზავნე. კრემლს 11 თვე დასჭირდა იმის გადასაწყვეტად, არიან თუ არა მზად მომცენ ნება რუსეთის მოქალაქე აღარ ვიყო", - განაცხადა ვაშაძემ.

კითხვაზე, არის თუ არა ის არჩევნების პირველი ტურის შედეგებით კმაყოფილი, ვაშაძე პასუხობს, რომ პირველ ტურში რეალურად მან გაიმარჯვა. 

- ფიქრობთ, რომ ეს შედეგები საქართველოს მოქალაქეებში თქვენი პოპულარობის ნიშანია თუ ამის მიზეზი მათგან დაღლაა, ვინც ახლა მთავრობაშია?

„ყველაფერი ერთად. მე მიცნობენ ჩემი გაწეული სამუშაოთი, როცა 5 წლის განმავლობაში საქართველოს საგარეო საქმეთა მინისტრი ვიყავი. მე მოვამზადე და წარმატებულად განვახორციელე კამპანია ოკუპირებული ტერიტორიების არაღიარების შესახებ. ამასთან, ჩვენ დავამყარეთ დიპლომატიური ურთიერთობები 58 სახელმწიფოსთან, რომლებთანაც მანამდე არანაირი დიპლომატიური ურთიერთობები არ გვქონია. ხელი მოვაწერე უმნიშვნელოვანეს საერთაშორისო შეთანხმებებს ჩემი ქვეყნისთვის, მათ შორის სავიზო რეჟიმის გამარტივების შესახებ შეთანხმებას“, - განაცხადა ვაშაძემ.

პრეზიდენტობის კანდიდატის თქმით, ევროკავშირთან ამ შეთანხმების გარეშე ახლა არანაირი ვიზლიბერალიზაცია არ იქნებოდა.

ჟურნალისტი ასევე დაინტერესდა ვაშაძისთვის საქართველოს ყოფილი პრეზიდენტის მიხეილ სააკაშვილის მხარდაჭერა უპირატესობაა თუ ნაკლი?

„საქართველოში ყველამ იცის, რომ აბსოლუტურად დამოუკიდებელი ვარ. დამოუკიდებელი ვიყავი, როცა ხელისუფლებაში 2008-დან 2012 წლამდე ვმუშაობდი. რაც შეეხება სააკაშვილს, ის ჩემი მეგობარია და როგორც საქართველოს ნებისმიერი გონიერი მოქალაქე მადლიერი ვარ მისი, რადგან მან საქართველო თანამედროვე სახელმწიფოდ აქცია. მას საქართველოში ცხოვრების უფლება უნდა ჰქონდეს და მოქალაქეობა უნდა დაიბრუნოს. თუ სამართალდამცავ ორგანოებს ან სასამართლო სისტემას სააკაშვილთან კითხვები ექნება, მან უნდა უპასუხოს", - განაცხადა ვაშაძემ.

კითხვაზე, დაუბრუნებს თუ არა ის სააკაშვილს მოქალაქეობას და შეიწყალებს თუ არა, ვაშაძე პასუხობს: „დიახ, მაგრამ მხოლოდ მის შეწყალებას არ ვაპირებ. მე ყველა პოლიტპატიმარს, აგრეთვე, პატიმარ ქალებს შევიწყალებ, რომლებსაც რამე განსაკუთრებული არ ჩაუდენიათ და ამის გაკეთებას ძალიან მალე, პირველ 2-3 თვეში ვაპირებ. როგორც იურისტს, მინდა, რომ სამართლიანობა აღდგეს და ეს ასეც იქნება. მესამე პრეზიდენტი აქ ცხოვრების უფლებას მიიღებს, გამოიყენებს თუ არა ის ამ უფლებას, ეს მასზეა დამოკიდებული. მისი პოლიტიკური მომავალი ქართველ ხალხზეა დამოკიდებული".

- საქართველოს კონსტიტუციით, პრეზიდენტის როლი საკმაოდ სიმბოლურია. რეალურად მას აღსრულების არანაირი უფლებამოსილება არა აქვს, რატომ არის ეს არჩევნები ასეთი მნიშვნელოვანი?

„ეს სრული სიცრუეა, რომ საქართველოს პრეზიდენტს საკმარისი უფლებამოსილება არა აქვს. პრეზიდენტი ქვეყნის უმაღლესი მთავარსარდალი და საერთაშორისო ურთიერთობებში ქვეყნის მთავარი წარმომადგენელია. მას აქვს ვეტოს უფლება. პრემიერმინისტრის დანიშვნისა და შეწყალების უფლება. ვერავინ ამიკრძალავს პოლიტიკურ პროცესებში მონაწილეობას. ვისურვებდი მენახა ნებისმიერი მთავრობა, როცა მოვუწოდებ 50 ან 100 000 თანამოქალაქეს ქუჩებში გამოვიდეს და ჩემს პროტესტს შეუერთდეს. ვინ შეძლებს ამის შეჩერებას? მხოლოდ წარმოიდგინეთ", - განაცხადა ვაშაძემ.

ჟურნალისტმა გრიგოლ ვაშაძეს კითხვა მის ოპონენტზეც დაუსვა: თქვენ ორივე საგარეო საქმეთა მინისტრები იყავით, თუმცა ზურაბიშვილი ფრანგი დიპლომატია, თქვენ კი საბჭოთა. ეს თქვენთვის პრობლემაა?

„არანაირი პრობლემა არ მაქვს. ვიყავი საბჭოთა დიპლომატი და ამით ვამაყობ და ფანტასტიკური სკოლა გავიარე. ე.წ. „ქართული ოცნება“ და ივანიშვილის ტელეარხები ცდილობენ ჩემი ბიოგრაფიით ითამაშონ და ამბობენ, რომ მე კა-გე-ბეს აგენტი ვარ. ეს არ მუშაობს", - განაცხადა ვაშაძემ.

კითხვაზე, გამარჯვების შემთხვევაში შეხვდება თუ არა ვლადიმერ პუტინს, ვაშაძე პასუხობს: „არა, იმიტომ, რომ არ ვიცი, როგორი იქნება კრემლის რეაქცია. საქართველომ თავისი დამოუკიდებლობით რუსეთს კავკასიაში სტრატეგიული როლი წაართვა, რუსეთი კი მის დასაბრუნებლად იბრძვის. თუმცა პრობლემა ისაა, რომ ოკუპირებული ტერიტორიები - ეს რუსული პრობლემის მოგვარება არაა".

ვაშაძემდე Deutsche Welle-მ ინტერვიუ პრეზიდენტობის დამოუკიდებელ კანდიდატს სალომე ზურაბიშვილს ჩამოართვა.