გრიგოლ ვაშაძის შტაბი დამოურჩილებლობაზე სააკაშვილის მოწოდებას არ იზიარებს

"ნაციონალური მოძრაობის" საპრეზიდენტო კანდიდატის, გრიგოლ ვაშაძის საარჩევნო შტაბის ხელმძღვანელი გიორგი ვაშაძე ემიჯნება მიხეილ სააკაშვილის გუშინდელ განცხადებას, რომელშიც ის სამოქალაქო დაუმორჩილებლობისკენ მოწოდებას აკეთებს. როგორც გიორგი ვაშაძემ თქვა, სააკაშვილის ეს სიტყვები მისი პირადი მოსაზრებაა და ნაციონალების ოპოზიციური ჯგუფი მას არ იზიარებს.

"ჩვენ ძალიან მკაფიოდ ვთქვით მიხეილ სააკშვილის განცხადებასთან დაკავშირებით. ეს არის მისი პერსონალური მოსაზრება, რასაც ამ ეტაპზე ჩვენ არ ვიზიარებთ, განსხვავებული მოსაზრება გვაქვს ამასთან დაკავშირებით და ჩვენ დღეს 18:00 საათზე გვექნება სწორედ ამაზე მსჯელობა ფილარმონიაში.

დამთავრდა ერთპიროვნული გადაწყვეტილებები და ახლა ზუსტად ის დროა, როცა გაერთიანებული ოპოზიცია და "ძალა ერთობაშია" აჩვენებს რეალურად საკუთარ სახეს და ძალას. აქ არის 11 პოლიტიკური სუბიექტი, რომელიც იღებს გადაწყვეტილებებს კონსენსუსით. ყველა წევრის მოსაზრებას გიზიარებთ ამ საკითხზე, თქვენ ვერც ერთ წევრს ვერ ნახავთ კოალიციაში, რომელსაც აქვს განსხვავებული მოსაზრება", - განაცხადა გიორგი ვაშაძემ.

ეგზიტპოლის შედეგების გამოქვეყნების შემდეგ, მიხეილ სააკაშვილმა თქვა, რომ შედეგებს არ ენდობა და მოსახლეობასა და ჯარს დაუმორჩილებლობისკენ მოუწოდა.

„ხვალინდელი დღიდან, მიუხედავად იმისა, რა შედეგები დადგება და იმედია, შედეგი იქნება, ჩვენ გადავდივართ მასობრივ დაუმორჩილებლობაზე. მე მოვუწოდებ საქართველოს პოლიციას, ჯარს, გაემიჯნოს კრიმინალურ მაფიოზურ ბანდას.მოგიწოდებთ თქვენ, აიღოთ საქართველოს გადარჩენა საკუთარ ხელში", -განაცხადა მიხეილ სააკაშვილმა "რუსთავი 2"-ის ეთერში. 

ცესკოს მონაცემებით, „ქართული ოცნების“ მიერ მხარდაჭერილმა დამოუკიდებელმა კანდიდატმა სალომე ზურაბიშვილმა ხმების 59.52% (1 147 627 ხმა) აიღო, „ნაციონალური მოძრაობის“ კანდიდატს გრიგოლ ვაშაძეს კი ამომრჩეველთა 40.48%-მა (780 633 ხმა) დაუჭირა მხარი.

28 ნოემბერს საქართველოს მოსახლეობამ 5-ის ნაცვლად 6 წლით, პირდაპირი წესით ბოლოჯერ აირჩია ქვეყნის პრეზიდენტი.

პირველი ტური 28 ოქტომბერს გაიმართა. ცესკოს მონაცემების თანახმად, „ქართული ოცნების“ მიერ მხარდაჭერილმა დამოუკიდებელმა კანდიდატმა სალომე ზურაბიშვილმა ხმების 38.64% მიიღო, „ნაციონალური მოძრაობის“ კანდიდატმა გრიგოლ ვაშაძემ - 37,74%.

2018 წლის საპრეზიდენტო არჩევნების მეორე ტურის საბოლოო შედეგებს შეგიძლიათ გაეცნოთ ამ ბმულზე.