გარევაჭრობა ბარათაშვილის ქუჩასა და კოლმეურნეობის მოედანზეც აიკრძალა

დღეს დილიდან, თბილისის მერიის ზედამხედველობის სამსახურის წარმომადგენლებმა ბარათაშვილის ქუჩასა და კოლმეურნეობის მოედნის მიმდებარე ტერიტორიაზე უნებართვო კონსტრუქციები დაშალეს. „თბილსერვის ჯგუფმა“ კი ტერიტორია  დაასუფთავა. ამ ტერიტორიაზე მოვაჭრეები მერიის ზედამხედველობის სამსახურმა რამდენიმე დღის წინ გააფრთხილა, რომ უნებართვო სამეწარმეო საქმიანობის განხორციელების უფლება აღარ მიეცემოდათ. შესაბამისად დღეს მოვაჭრეები ტერიტორიაზე არ გამოჩენილან.

როგორც მერიის მიერ გავრცელებულ განცხადებაშია ნათქვამი, დედაქალაქის მთავრობამ უკვე გამართა მოლაპარაკებები ბაზრობების ასოციაციის წარმომადგენლებთან, რის შედეგადაც გადაწყდა, რომ ასოციაცია, შეღავათიანი პირობებით, 6 თვის ვადით, გარემოვაჭრეებს  სავაჭრო ადგილს დაუთმობს. გარემოვაჭრეებს საკუთარი პროდუქციის რეალიზაცია რკინიგზის სადგურსა და მის მიმდებარე ტერიტორიაზე, დინამოს მიმდებარე ტერიტორიაზე, მეტრო-სადგურ დიდუბის მიმდებარე ტერიტორიაზე, ძველი დეზერტირების ბაზრის ადგილას აშენებული ახალი ბაზრის ტერიტორიასა და  ისნისა და სამგორის ბაზრობებზე შეეძლებათ.

თბილისის მერიამ უნებართვო გარევაჭრობის წინააღმდეგ ზომების მიღება ერთი კვირის წინ დაიწყო. 19 მარტს  აღმაშენებლის გამზირზე, მეტრო მარჯანიშვილის მიმდებარე ტერიტორიები გაათავისუფლეს. მოგვიანებით გარემოვჭრეებმა მერიის გადაწყვეტილება გააპროტესტეს და მერიასთან აქცია გამართეს. ორი დღის წინ კი დედაქალაქის მთავრობა გარემოვაჭრეების პროტესტს გამოეხმაურა და განცხადება გაავრცელა, სადაც ნათქვამია, რომ გარემოვაჭრეებს მუნიციპალიტეტის ტერიტორიაზე უკანონო საქმიანობის უფლება აღარ მიეცემათ.