მამუკა ბახტაძე: ევროპარლამენტარებმა გაგვაფრთხილეს, რომ პრეზიდენტად საბჭოთა დიპლომატის არჩევა მიუღებელია

საქართველოს პრემიერმინისტრმა მამუკა ბახტაძემ ბრიფინგი გამართა, რომელზე ევროპარლამენტში საქართველოს მიერ ასოცირების შეთანხმების შესრულებაზე ანგარიშის კენჭისყრასთან დაკავშირებით გააკეთა განცხადება. მან ყურადღება გაამახვილა ევროპარლამენტში გამართული დებატების დროს ევროპარლამენტარების მიერ საქართველოში მიმდინარე საარჩევნო პროცესების შეფასებებზე. 

პრემიერმინისტრმა ევროპარლამენტის წევრებს საქართველოსთვის გამოხატული მხარდაჭერისთვის მადლობა გადაუხადა. 

"ჩემთვის საამაყოა, რომ ჩვენი ხელისუფლების სწორი და ეფექტური მუშაობის შედეგად, ევროპარლამენტისგან საქართველომ უპრეცედენტოდ პოზიტიური შეფასებები მიიღო და ევროინტეგრაციის კუთხით შეფასდა, როგორც ყველაზე წარმატებული ქვეყანა. მინდა ხაზი გავუსვა - ყველაზე წარმატებული ქვეყანა. 

ევროპარლამენტი მიესალმება საქართველოში უკანასკნელი წლების განმავლობაში განხორციელებული რეფორმების უწყვეტ კურსს, ქვეყნის დემოკრატიულ და ინსტიტუციურ განვითარებას, ასევე ასოცირების შეთანხმების განხორციელებაში მიღწეულ მნიშვნელოვან პროგრესს, რამაც ევროპარლამენტარების განცხადების თანახმად, ქვეყანა ევროკავშირის ერთ-ერთ ძირითად პარტნიორად წარმოაჩინა რეგიონში. 

ევროპარლამენტარებმა ხაზგასმით აღნიშნეს, რომ უკანასკნელ წლებში საქართველო სამაგალითო გახდა ევროკავშირთან თანამშრომლობის ყველა მიმართულებით, რომ ჩვენს ქვეყანაში არის მდგრადი დემოკრატია, ხოლო ეკონომიკური რეფორმების და კორუფციასთან ბრძოლის კუთხით, საქართველო ევროკავშირის არაერთ ქვეყანას უსწრებს. სხვათა შორის იმავეს ადასტურებს რამდენიმე დღის წინ გამოქვეყნებული მსოფლიო ბანკის საერთაშორისო რეიტინგიც. 

მკაფიოდ ითქვა, რომ საქართველოს როგორც ევროინტეგრაციის კუთხით მოწინავე ქვეყანას, ევროკავშირმა კიდევ უფრო მეტი, მათ შორის ფინანსური მხარდაჭერა უნდა აღმოუჩინოს. ევროკომისარმა იოჰანეს ჰანმა საქართველოს ეკონომიკას შთამბეჭდავი უწოდა, რაც კიდევ ერთხელ ადასტურებს ხელისუფლების ეფექტურ მუშაობასა და საქართველოს ეკონომიკის მზარდ ტენდენციას. 

საქართველოსადმი ამ მხარდაჭერის პოზიციების გამოხატვის პარალელურად სამარცხვინოდ შეფასდა პრეზიდენტობის ქალი კანდიდატის, სალომე ზურაბიშვილის მიმართ წარმოებული ბინძური და შეურაცხმყოფელი კამპანია. ამავდროულად, ევროპარლამენტარებმა, საქართველოს გულშემატკივრებმა და ჩვენმა ნამდვილმა მეგობრებმა გაგვაფრთხილეს, რომ საქართველოს პრეზიდენტის პოსტზე საბჭოთა დიპლომატის არჩევა მიუღებელია. 

რა თქმა უნდა, მე მწამს ქართველი ხალხის და დარწმუნებული ვარ რომ არ იქნება დაშვებული ქვეყნის პრეზიდენტად საბჭოთა დიპლომატის არჩევა", - განაცხადა პრემიერმინისტრმა მამუკა ბახტაძემ.

„ნაციონალური მოძრაობის“ კანდიდატი, ყოფილი საბჭოთა დიპლომატი, ვერ იქნება მისაღები საქართველოს პრეზიდენტის პოსტზე - ამ შინაარსის განცხადება ევროპარლამენტარმა ვიქტორ ბოშტინარუმ გააკეთა.  

„მჯერა, რომ საქართველო და მოლდოვა მნიშვნელოვანი ქვეყნები არიან ევროკავშირისთვის. ამაზე მეტყველებს პროგრესი, რომელსაც ორივე ქვეყანამ მიაღწია. გასაკუთრებით საქართველომ. ამაზე მეტყველებს ქვეყანაში ჩატარებული საპრეზიდენტო არჩევნები. ამასთან, გვინდა იმის თქმაც, რომ ყოფილი რუსი ელჩი და „ნაციონალური მოძრაობის“ კანდიდატი ვერ იქნება მისაღები საქართველოს პრეზიდენტის პოსტზე“, - განაცხადა ვიქტორ ბოშტინარუმ.

ანა გომეში კი, რომელიც არჩევნებს აკვირდებოდა, აცხადებს, რომ ის თავდასხმები და აგრესია, რომელიც მიმდინარეობს ქალი კანდიდატის მიმართ, საქართველოს მიუღებელი და სირცხვილია.

შეგახსენებთ, რომ DW-სთან ინტერვიუში "ნაციონალური მოძრაობის" საპრეზიდენტო კანდიდატმა გრიგოლ ვაშაძემ განაცხადა, რომ ის ამაყობს საბჭოთა დიპლომატად მუშაობით. 

„არანაირი პრობლემა არ მაქვს. ვიყავი საბჭოთა დიპლომატი და ამით ვამაყობ და ფანტასტიკური სკოლა გავიარე. ე.წ. „ქართული ოცნება“ და ივანიშვილის ტელეარხები ცდილობენ ჩემი ბიოგრაფიით ითამაშონ და ამბობენ, რომ მე კა-გე-ბეს აგენტი ვარ. ეს არ მუშაობს", - განაცხადა ვაშაძემ.

შეგახსენებთ, რომ „ნაციონალური მოძრაობის“ საპრეზიდენტო კანდიდატის, გრიგოლ ვაშაძის წინასაარჩევნო კამპანია წარმოშობით ბელარუსმა პოლიტტექნოლოგმა ვიტალი შკლიაროვმა და რუსეთის მოქალაქეებმა წარმართეს. 7 კაციანი PR-ჯგუფი არჩევნების პირველი ტურის შედეგებს ვაშაძის შტაბში რუსული შეძახილებით ზეიმობდა. რუსეთის ყოფილი მოქალაქე გრიგოლ ვაშაძე და მისი პოლიტიკური ჯგუფი ამაში პრობლემას ვერ ხედავენ და ამტკიცებენ, რომ ოკუპანტი ქვეყნის პროექტს არა ისინი, არამედ მათი მთავარი ოპონენტი წარმოადგენს.