დასახელდა მიზეზები, რის გამოც საქართველოში შვილის აყვანის პროცესი ჭიანურდება

2018 წელს სოციალური მომსახურების სააგენტოში შვილად აყვანის 10 მსურველი დარეგისტრირდა, 2017 წელს კი მათი რაოდენობა 162-ია. ამასთან, ოჯახი, რომელიც ბავშვის აყვანის მსურველთა რიგში პირველია, შვილის აყვანას 20 წელია ელოდება, სიაში რიგით მეორე ოჯახს ბავშვის აყვანა 18 წელია სურს, მესამეს კი - 17 წელი. ამის შესახებ ინფორმაციას სააგენტო "ინტერპრესნიუსი" სოციალური მომსახურების სააგენტოზე დაყრდნობით ავრცელებს.

რაც შეეხება 2018 წელს, როგორც სააგენტოს მეურვეობისა და მზრუნველობის სამმართველოს მთავარი სპეციალისტი, გიორგი კუპრეიშვილმა განმარტა, შვილის ასაყვანად დარეგისტრირების მსურველთა საკითხების განხილვა ისევ მიმდინარეობს, ამიტომ მათი რაოდენობა გაიზრდება.

ის თუ რატომ ჭიანურდება შვილად აყვანის პროცესი, სააგენტოს თანამშრომელი ამბობს, რომ ამის მიზეზი შესაძლოა იყოს როგორც საკანონმდებლო (რომელიც ასაკობრივ ზღვართან დაკავშირებით არის დაწესებული), ასევე შვილად აყვანის მსურველი ოჯახისმ იერ ასაყვან ბავშვთან დაკავშირებული მონაცემები (ასაკი, სქესი, ჯანმრთელობის მდგომარეობა). 

"შესაძლებელია, ოჯახმა რამდენიმე შეთავაზებაზე უარი თქვას, მათი სასურველი მონაცემების ბავშვი არ გამოვლინდეს ან მშვილებელთა დიდი ხნის განმავლობაში ლოდინის მიზეზი თვითონ ბავშვის უარიც გახდეს. გარდა ამისა, ახალი კანონის თანახმად, შესაძლებელია, შვილად აყვანის პროცედურის შეფერხების მიზეზი უკვე ასაკიც იყოს, რადგან „შვილად აყვანის შესახებ“ კანონში მშვილებელსა და ბავშვს შორის ასაკობრივ სხვაობად 49 წელი განისაზღვრა", - განაცხადა გიორგი კუპრეიშვილმა.

საქართველოში შვილად აყვანა და მისი პროცედურები საოჯახო სამართლის სფეროს განეკუთვნება და მას სამოქალაქო კოდექსი არეგულირებს.