სერგეენკო: საქართველოს მასშტაბით ტამიფლუს განაწილება ხვალიდან დაიწყება

ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა დავით სერგეენკომ „ქრონიკასთან“ საუბრისას განაცხადა, რომ ახალხანს გავრცელებული ინფორმაცია 26 წლის ქალის გარდაცვალების შესახებ მათთვის ცნობილია, თუმცა ვერ ადასტურებენ იყო თუ არა მიზეზი გრიპის გართულება, რადგან არ არსებობს ლაბორატორიული სინჯი, თუმცა კლინიკურად ეს შემთხვევა გრიპის გართულებას ჰგავდა. 

„ბოლო დღეების ანალიზია ასეთია, საგრძნობლად არის შემცირებული ლაბორატორიული მიმართვები,  თითქმის იგივეა ჰოსპიტალური პაციენტების რაოდენობა. რაოდენობრივად გაზრდილმა ავადობამ უკან დაიხია, თუმცა ეს უკან დახევა არ ახდენს გავლენას თვითონ დაავადებაზე. დაავადება მძიმე რჩება და სჭირდება მკურნალობა“,- განაცხადა დავით სერგეენკომ. 

ჯანდაცვის მინისტრის თქმით, თბილისის აფთიაქებში უკვე განაწილებულია „ტამიფლუს“ რაოდენობა, ხოლო რეგიონებში ხვალ 12 საათიდან დაიწყება აქტიური მუშაობა. „იქ სადაც აფთიაქებში ვერ მივლენ დროულად, ხვალიდან რაიონული ჯანდაცვის ცენტრებში შეივსება მარაგები“, - აღნიშნა ჯანდაცვის მინისტრმა.

მინისტრის თქმით, „ტამიფლუს“ უფასოდ გაცემის ინიციატივა არავის ხარჯზე არ აისახება. „ჩვეულებრივ ეს ავადობა გვიჯდება პლიუს 10 მილიონი ლარი ყოველ წელს, რადგან ტამიფლუ გავაფართოვეთ, დანახარჯები სავარაუდოდ გაიზრდება 10%-ით. სარეზერვო ფონდიდან გამოყოფა არ სჭირდებაა. დანახარჯი ბიუჯეტის ნაწილია“, - განმარტა სერგეენკომ.

პრეპარატ „ტამიფლუს“ მოსახლეობისთვის სახელმწიფო სუბსიდირებით გაცემაზე გადაწყვეტილება საქართველოს მთავრობამ 11 იანვარს მიიღო.