ბესელიას თქმით, კობახიძის გადასაწყვეტი არ არის, იქნება თუ არა ის სასამართლო რეფორმებზე მომუშავე ჯგუფში

პარლამენტის თავმჯდომარე ირაკლი კობახიძე დეპუტატ ეკა ბესელიას განცხადებებს გამოეხმაურა და თქვა, რომ ვიცესპიკერობის შეთავაზება კომიტეტის თავმჯდომარეობიდან ჩამოშორების მცდელობა კი არა, გადაწყვეტილება იყო.

პარლამენტის თავმჯდომარის განმარტებით, შეთავაზებას კონკრეტული საფუძველი ჰქონდა, თუმცა შიდა სამზარეულოა და პარლამენტის თავმჯდომარე დეტალებს არ აკონკრეტებს. 

ეკა ბესელია კი პარლამენტის თავმჯდომარეს ურჩევს, ბოლომდე თქვას, რას გულისხმობდა შიდა სამზარეულოში. ამასთან, დეპუტატის განცხადებით, მას არ სჭირდება ირაკლი კობახიძის თანხმობა სამუშაო ჯგუფში მუშაობასთან დაკავშირებით, რადგან ამ ჯგუფის წევრია და პარლამენტის თავმჯდომარის განმარტება მისთვის უხერხულია.

"ნამდვილად არ ვითხოვ ამ სამუშაო ჯგუფის დაპატენტებას, მაგრამ ეს ჯგუფი ჩემი შექმნილია 2017 წელს, მოგვიანებით ირაკლი კობახიძემ გადაწყვიტა რომ გადაებარებინა, მაგრამ შემადგენლობა და წევრები არის განსაზღვრული და მე არ მჭირდება მისი განსაკუთრებული თანხმობა, მანდატი, ამ ჯგუფში ვიმუშავებ თუ არა. ცოტა უხერხული იყო მისი ეს კომენტარი. მე ამ ჯგუფში ვარ და ჩემი ამ ჯგუფიდან გამოყვანა არ არის ირაკლი კობახიძის გადასაწყვეტი. მე არ მჭირდება არავის ნებართვა. ექსკლუზივების დაწესება ეს არ არის კონსტრუქციული მიდგომა. არ ვურჩევ მას, ამ ფორმით იმუშაოს კოლეგებთან. ძალიან არაკორექტული მეჩვენა ეს განცხადება. ამიტომ, პირველ რიგში, ჯერ დააზუსტოს გამონათქვამი, არ ვიცი, ვისთან რა უნდა იმსჯელოს. მე ყველა ფორმატში ვიმუშავებ რომელიც მართლმსაჯულების რეფომას ეხება, ეს არის პროცესი რომელიც უნდა მივიყვანოთ ბოლომდე", - თქვა ბესელიამ.

"იმ ადამიანებს, ვინც ცდილობს სიცრუე შესთავაზოს საზოგადოებას და მოიფიქროს რაღაც სხვა ვერსია ვიცე-სპიკერის თანამდებობის შეთავაზებაზე, მე ვურჩევ ან შეწყვიტოს ამაზე საუბარი ან პირდაპირ თქვას რას გულისხმობს. ასე რებუსებით საუბარი არის საზოგადოების დიდი უპატივცემულობა. აქამდე თუ ვერ მოიფიქრეს რა ვერსია უნდა შეთხზან, მაშინ თავი დაანებონ ასე საუბარს. არსებობს მხოლოდ ერთადერთი სიმართლე, მე როცა სასამართლო რეფორმის მეოთხე ეტაპის სამუშაო ჯგუფი შევქმენი ეს იყო პირველი განაცხადი, რომ რეფორმას ვაგრძელებდით. უვადოდო დანიშვნებთან დაკავშირებით, რომელსაც ახორციელებდა იუსტიციის საბჭო და არა პარლამენტი მქონდა კრიტიკული პოზიცია, რადგან ეს ეწინააღმდეგებოდა სამუშაო ჯგუფის სულისკვეთებას და ასევე იყო საკითხი, რომელიც ეხებოდა იუსტიციის საბჭოს წევრთა უფლებამოსილების ხელახლა გაგრძელებას და მესამე ეს სია, რომელიც მზადდებოდა მას სჭირდებოდა თავისუფალი სივრცე, არ უნდოდათ ბარიერები იურიდიული კომიტეტიდან. ეს იყო რეალური მიზეზები, რასაც მოჰყვა ზაფხულში ჩემთვის ვიცე-სპიკერის თანამდებობის შეთავაზება", - თქვა ეკა ბესელიამ.

14 იანვარს ეკა ბესელიამ პრესკონფერენცია გამართა, სადაც ბოლო პერიოდში გუნდურობის პრინციპის დარღვევასთან დაკავშირებითაც გააკეთა განცხადება. ეკა ბესელია ირწმუნება, რომ გუნდურობის პრინციპი არ დაურღვევია. თქვა ისიც, რომ მისი მეგობრების და თავად მისი მიზანი ნაწილობრივ მიღწეულია, რადგან უზენაესი სასამართლოს მოსამართლეობის კანდიდატების წარდგენილი სიის დამტკიცება შეჩერებულია.