საფრანგეთის, გერმანიის, შვეციარიის და შვედეთის ელჩებს გიორგი გახარიასთან შეხვედრა სურთ

საფრანგეთის, გერმანიის, შვეციარიისა და შვედეთის ელჩები შინაგან საქმეთა მინისტრ გიორგი გახარიასთან შეხვედრას  მოითხოვენ. ამის შესახებ საქართველოში საფრანგეთის ელჩმა პასკალ მენიემ დღეს მედიასთან გერმანია-საფრანგეთის დღეების ფარგლებში კავკასიის ფრანგულ სკოლაში ვიზიტისას ისაუბრა. 

პასკალ მენიეს განმარტებით, ქართველებს, რომლებიც პოლიტიკურ თავშესაფარს ითხოვენ, რეალურად მოტივაცია არ აქვთ: „მათ მოტივაცია ეკონომიკურია და ამიტომ ლტოლვილის სტატუსს არ იმსახურებენ"

ელჩი ამბობს, რომ ამ პრობლემასთან ბრძოლის მიზნით, საქართველოს მთავრობასთან განიხილება დამატებითი ზომები:

„შენგენის ზონაში რამდენიმე ქვეყანა, საფრანგეთი, შვედეთი, გერმანია, საბერძნეთი და შვეიცარია დგანან მწვავე და გაზრდილი გამოწვევის წინაშე როგორიცაა თავშესაფრის მაძიებლების გაზრდილი რაოდენობა. თუ მაგალითად ავიღებთ საფრანგეთს, ვიზალიბერალიზაციამდე თვეში ჰქონდა ორასამდე ქართველი აპლიკანტის განცხადება, რომლებიც ჩამოდიოდნენ საფრანგეთში და ითხოვდნენ პოლიტიკურ თავშესაფარს. თანხმობის სტატისტიკა იყო 7%. ძირითადად ვაკმაყოფილებთ ისეთ ხალხს, რომლებიც არიან ლგბტ თემის წარმომადგენლები ან ისეთი პირები, რომლებიც განიცდიან პოლიტიკურ დევნას. ვინაიდან საქართველო არის უსაფრთხო ქვეყანა, მიზეზი არ რჩება იმისთვის, რომ თავშესაფრის მაძიებელთა დიდი რაოდენობა იყოს. რაც მოხდა ვიზალიბერალიზაციის შემდეგ, თავშესაფრის მაძიებელთა რიცხვი გაიზარდა და 2017 წელს მიაღწია 600,  2018 წლის დეკემბერში 1000. საფრანგეთი არის გულისხვი ქვეყანა, მაგრამ მივესალმებით ისეთი ადამიანების მხრიდან თავშესაფრის მოთხოვნას, რომლებიც მართლა არიან დევნის მსხვერპლი. ასეთები არიან სირიის და ავღანეთის მოქალაქეები."

საქართველოში საფრანგეთის ელჩის, პასკალ მენიეს განცხადებით, თავშესაფრის მაძიებელი ადამიანები არიან საქართველოდანაც: „მაგრამ საქართველო ქეისად არ გამოდგება, რადგან პოლიტიკურ დევნაზე მეტად პრობლემაა ეკონომიკური მიგრაცია, რომელიც არალეგალურია. ასეთ ხალხს ჩვენ უკან ვაბრუნებთ თვითმფრინავით. არ გვინდა რომ ასეთი პრაქტიკა გაგრძელდეს. ჩვენ საქართველოს მთავრობასთან განვიხილავთ დამატებით ზომებს რაც უნდა იქნას მიღებული ამ პრობლემასთან საბრძოლველად. ჩვენ გვინდა რომ გვყავდეს ტურისტები, ჩვენ ასევე მივესალმებით ლეგალურ იმიგრაციას, ვცვლით რეგულაციებს სტუდენტებთან მიმართებით და ნებას ვრთავთ დამატებით ერთი წელი დარჩნენ და იმუშაონ. ასევე გავცემთ სამუშაო ვიზებს 50 კატეგორიის პროფესიაზე.“ 

საქართველოში საფრანგეთის ელჩის განცხადებით, სხვების გადაცდომების გამო. უდანაშაულო ხალხი არ უნდა დაისაჯოს: „შემაშფოთებელია, რომ  ეს ხალხი დაკავშირებულია ორგანიზებულ დანაშაულთან. ვფიქრობ ეს იმ ქსელის გადაცდომაა რომლის იმედადაც ჩამოდიან საფრანგეთში, რომ იპოვნიან სამსახური, მაგრამ მას შემდეგ რაც ვერ პოულობენ ასე მარტივად, იწყებენ ქურდობას და ხდებიან კრიმინალები.“

პასკალ მენიე ამბობს, რომ მისი შვედი კოლეგის თქმით, სტოკჰოლმში ქურდების 50% არიან ქართველები;

„ეს ქართველებს ძალიან ცუდ იმიჯს უქმნის. ვფიქრობ ეს ხალხი არიან ორგანიზებული დანაშაულის მსხვერპლი. მოვუწოდებ ქართველებს, არ დაუჯერონ მათ და ნუ იფიქრებთ, ჩამოხვალთ საფრანგეთში და მიიღებთ პოლიტიკურ თავშესაფარს. პოლიტიკურ თავშესაფარს ვერ მიიღებთ, მაგრამ აღმოჩნდებით ორგანიზებულ დანაშაულში ჩართული. ვფიქრობ, როცა ქვეყანაა უსაფრთხო, თავშესაფრის მაძიებლების დაკმაყოფილების პროცენტული მაჩვენები დაბალია. დღეს საფრანგეთში ეს მაჩვენებელი 3 პროცენტია. გერმანიასა და შვეიცარიაში თითქმის 0. ვფიქრობ საფრანგეთშიც ეს მაჩვენებელი ნოლზე უნდა დავიდეს. ვფიქრობთ, რა ღონისძიებებით შეიძლება საქართველოსთან თანამშრომლობით ამ ტენდენციის შეჩერება. ეს ძალიან დამაზარალებელია ჩვენთვის. ინფორმაციის გაცვლის მიზნით, კონსულტაციებს გავდივართ საფრანგეთის, გერმანიის, შვეიცარიისა და შვედეთის ელჩები ერთმანეთთან. ვაპირებთ მოვითხოვოთ შეხვედრა შს მინისტრ გიორგი გახარიასთან, რათა ეს სიტუაცია განვიხილოთ.“