თელავში ბებიის მხრიდან ძალადობის გამო მოზარდს სამედიცინო დახმარება დასჭირდა

კიდევ ერთი ძალადობის შემთხვევა დაფიქსირდა კახეთში. თელავის ერთ-ერთ სოფელში 10 წლის ბიჭს სავარაუდოდ ბებია ფიზიკურად გაუსწორდა.

არასრწულოვანი მიყენებული დაზიანებებით პოლიციის თანხლებით თელავის რეფერალურ საავადმყოფოშიც მოხვდა. ექიმის თქმით, მის სიცოცხლეს საფრთხე არ ემუქრება, თუმცა ბავშვს სახეზე და სხეულის სხვადასხვა ადგილზე დალურჯებები, ცხვირზე შეშუპება აღენიშნებოდა. შესაბამისი მკურნალობის შემდეგ პაციენტი სახლში გაწერეს.

მომხდარის შესახებ ინფორმაცია აქვს სოციალური მომსახურების კახეთის სამხარეო სააგენტოს. შეტყობინება მათთან პარასკევს,  3 მაისს შევიდა. ირკვევა, რომ არასრულწლოვანი ბებიას უკვე განაშორეს და მასზე დროებით ზრუნვა მამიდას დაეკისრა.

imedinews-ის ინფორმაციით, არასრულწლოვანის მშობლები საქართველოში არ არიან, რის გამოც ბავშვი ბებიასთან იზრდებოდა.

სოციალურ მომსახურების სააგენტოში განმარტავენ, რომ სავარაუდო მოძალადე ქალს 10 წლის ბიჭზე მეურვეობის კანონიერი უფლება არ ჰქონდა და მასზე მხოლოდ სოფლის ტერიტორიული ორგანოს რწმუნებულის მინდობილობა იყო გაცემული.

ბებიის მიერ არასრულწლოვან ბიჭზე ძალადობის შესახებ imedinews-ის მიერ გავრცელებული ინფორმაციის შემდეგ პირველ კომენტარს სკოლის დირექტორი აკეთებს. მაია ოთარაშვილი აცხადებს, რომ სკოლაში მოსულ ბავშვს სახის არეში დაზიანებები აღენიშნებოდა, რის გამოც სკოლის ადმინისტრაციამ დროული რეაგირება მოახდინა და ფაქტის შესახებ პოლიციას შეატყობინა.

„ადრე იყო შემთხვევა, მაშინ ბავშვმა თქვა, რომ კატამ დაკაწრა. ბოლოს კი სპეცმასწავლებელმა შენიშნა, რომ ნაკაწრები ჰქონდა და ყურზე სისხლი აღენიშნებოდა. როგორცვე ეს შევამჩნიეთ დავრეკეთ პოლიციაში და საავადმყოფოში გადაიყვანეს. მერე ნათესავმა წაიყვანა ბიჭი თავისთან, ერთ-ერთ სოფელში. ახლა თავს კარგად გრძნობენ. დედა საზღვარგარეთ ცხოვრობს და ეს ბავშვები ბებია-პაპასთან იზრდებოდნენ. სპეციალური საგანმანათლებლო საჭიროების ბავშვია. ის კარგი ყოფაქცევით გამოირჩევა სკოლაში“, - განმარტა სკოლის დირექტორმა მაია ოთარაშვილმა. 

შინაგან საქმეთა სამინისტრომ ფაქტზე გამოძიება 126-ე მუხლით დაიწყო, რაც ოჯახის ერთი წევრის მიერ ოჯახის სხვა წევრის მიმართ ძალადობას, სისტემატურ შეურაცხყოფას, შანტაჟს ან დამცირებას გულისხმობს, რამაც ფიზიკური ტკივილი ან ტანჯვა გამოიწვია.