ოქრუაშვილი: გამოძიებას ვუთხარი, რომ პარლამენტში შესვლას ხელფასის ასაღებად ვაპირებდი

თბილისის საქალაქო სასამართლოში, „გამარჯვებული საქართველოს“ დამფუძნებელი, თავდაცვის ყოფილი მინისტრი, ირაკლი ოქრუაშვილი მაგისტრი მოსამართლის თანდასწრებით, მოწმის სტატუსით გამოკითხეს. 

ოქრუაშვილმა ჟურნალისტებთან დაასახელა რამდენიმე შეკითხვა, რომელიც მისი თქმით, გამოკითხვის დროს დაუსვეს. 

„გამოკითხვის საჭიროება ვერ დავინახე იმ დროიდან გამომდინარე, რომელიც ჩემ გამოკითხვას დაეთმო. საკმაოდ კარგ, ხუმრობის ხასიათზე ვიყავი და შეკითხვაზე, ვაპირებდი თუ არა პარლამენტში შესვლას და რა მიზნით, ვუპასუხე, რომ ვაპირებდი, რადგან 2003 წელს გავხდი დეპუტატი და სამი თვის განმავლობაში, ვიდრე პარლამენტი პროკურორობის გამო შემიწყვეტდა უფლებამოსილებას, ხელფასი მქონდა ასაღები. 

მერე მკითხეს, წინა მხრიდან რატო აპირებდი შენობაში შესვლას, ვუპასუხე, რომ მეგონა, ბუღალტერია წინიდან იყო. მერე მითხრეს პოლიციელებმა, რომ გვერდიდან არისო და გვერდიდან წავედი. ბოლოს პასუხი მივიღე, რომ ხელფასს არ მოგცემთო. 

ერთადერთი აზრიანი კითხვა იყო - რას მოვიმოქმედებდი, თუ ხალხი შევიდოდა პარლამენტში, ძალიან მარტივი პასუხია - ხალხს პარლამენტში შევყვებოდი იმის გამო, რომ რამე სახის გართულება არ მომხდარიყო“, - განუცხადა ჟურნალისტებს ოქრუაშვილმა.  

მისივე თქმით, წინა რიგებში იდგა და ხალხს აშოშმინებდა. „ამოიღეთ კადრები, ეს ყველგან ჩანს“, - აღნიშნა ოქრუაშვილმა. 

ირაკლი ოქრუაშვილი შინაგან საქმეთა სამინისტროში მიმდინარე გამოძიების ფარგლებში გამოიკითხა, რომელიც ჯგუფური ძალადობის ორგანიზებას, ხელმძღვანელობას ან მასში მონაწილეობას გულისხმობს. საქმე ეხება 20 ივნისს მომხდარ ინციდენტს, როდესაც საღამოს პარლამენტთან მშვიდობიანი აქციის შემდეგ, მომიტინგეების ნაწილმა შენობაში შეჭრა შტურმით სცადა. სპეცრაზმმა აქციის დაშლა დაიწყო და რამდენჯერმე გამოიყენა ცრემლმდენი გაზი, წყლის ჭავლი და რეზინის ტყვიები. შედეგად საავადმყოფოში გადაიყვანეს 240 ადამიანი, მათგან 80 სამართალდამცველი, 4 ადამიანს თვალი დაუზიანდა, ერთმა მოქალაქემ და ერთმა სამართალდამცველმა კი დაკარგა.

რუსთაველის საპროტესტო აქციები მას შემდეგ დაიწყო, რაც პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა. ამ ფაქტს საპროტესტო აქციების ტალღა და პარლამენტის თავმჯდომარის, ირაკლი კობახიძის გადადგომა მოჰყვა. 

20-21 ივნისის აქციების საქმის გამოძიების დასრულებამდე შსს-ს განსაკუთრებულ დავალებათა დეპარტამენტის უფროსს უფლებამოსილება შეუჩერდა.