გირჩის წევრები პოლიციაში კანაფის ფესტივალის საქმეზე დაიბარეს

„გირჩის“ წევრები დღეს, პოლიციის მთავარ სამმართველოში დაიბარეს. შსს-ს ინფორმაციით, საქმე 2018 წლის 20 ოქტომბერს გამართულ კანაფის ფესტივალს ეხება. უწყებაში ამბობენ, რომ „გირჩის“ 7 წევრი ამ საკითხთან დაკავშირებით საქმის მასალების გასაცნობად დაიბარეს.

პოლიციასთან ზურაბ გირჩი ჯაფარიძეც იმყოფება, თუმცა ის სამმართველოში დაბარებულთა სიაში არ არის. მისი განცხადებით, თავად იყო ამ ფესტივალის ორგანიზატორი და გამოძიებას თუ ვინმე უნდა აინტერესებდეს, ეს სწორედ თავადაა.

ჯაფარიძე გამოძიების მხრიდან დიდი დროის გასვლის შემდეგ დაინტერესებას შინაგან საქმეთა სამინისტროს მხრიდან დაშინების მცდელობად აფასებს და ამას ე.წ. ბიბლიური თავისუფლებისა და ტაქსების საკითხს უკავშირებს.

თბილისში თეთრი ფერის ტაქსების რეგულაციის ამოქმედების შემდეგ, პოლიტიკური გაერთიანება „გირჩის“ ლიდერმა ზურაბ ჯაფარიძემ ახალი რეგულაციის დასარღვევად თბილისის ქუჩებში ნაცრისფერი ტაქსით იარა, რის გამოც პოლიციამ მას 200-ლარიანი ჯარიმა გამოუწერა. 

რელიგიური ორგანიზაცია „ბიბლიური თავისუფლება“კი  „გირჩმა“ 2017 წლის აპრილის ბოლოს დააფუძნა. პარტიის ლიდერმა ზურაბ ჯაფარიძემ განმარტა, რომ რელიგიური ორგანიზაცია „გირჩის“ მსგავსად თავისუფლების იდეასაც ქადაგებს. მან თქვა, რომ „ბიბლიური თავისუფლება“ ახალგაზრდებს სავალდებულო სამხედრო სამსახურის გადავადებაშიც ეხმარება.