საქალაქო სასამართლოში დღეს ის პოლიციელები დაკითხეს, რომლებმაც საპატიმროში გიორგი რურუასგან დნმ აიღეს

საგამოძიებო ორგანომ სასამართლოს მიმართა და აღებული იყო განჩინება, რომ გიორგი რურუასგან დნმ-ის ნიმუში მოეპოვებიათ, - ამის შესახებ ჟურნალისტებს გიორგი რურუას საქმის პროკურორმა, ვასილ სამხარაძემ განუცხადა.

საქალაქო სასამართლოში დღეს ის პოლიციელები დაიკითხნენ, რომლებმაც საპატიმროში რურუასგან დნმ აიღეს.

პროკურორის განცხადებით, ბრალდების მხარე მიიჩნევს, რომ რამე არსებით დარღვევას ჩხრეკისა და დნმ-ის აღების დროს ადგილი არ ჰქონია.

,,დღეს დაიკითხა დაცვის მხარის 5 მოწმე, რომლებიც უშუალოდ მონაწილეობდნენ ერთ-ერთ საგამოძიებო მოქმედებაში, რომელიც ჩატარდა მერვე პენიტენციურ დაწესებულებაში. მოხდა მისი ნივთების ამოღება. აქ მნიშვნელოვანია, რატომ ჩატარდა ეს საგამოძიებო მოქმედება, რა უძღვოდა წინ გამოძიების ეტაპზე. თავდაპირველ ეტაპზე მოპოვებული იქნა პირადი ჩხრეკისას ცეცხლსასეოლი იარაღი, რომელზეც აღმოჩნდა დნმ-ის კვალი, თუმცა ვინაობა არ იყო დადგენილი. შესაბამისად, საგამოძიებო ორგანომ მიმართა სასამართლოს და აღებული იქნა განჩინება, რომ დნმ-ის ნიმუში მოპოვებულიყო გიორგი რურუასგან. მან უარი განაცხადა აღნიშნულ მოქმედებაზე და შემდეგში სასამართლოს მივმართეთ, რომ მისი პირადი ნივთები მოპოვებულიყო. ამ საგამოძიებო მოქმედებიდან მალევე გიორგი რურუამ ნებაყოფლობით მოგვცა ნერწყვის ნიმუში და გამოძიებამ არ ჩათვალა საჭიროდ, 3 იანვარს ამოღებული ნივთები მასზე ჩატარებული ექსპერტიზები აღარ წარმოედგინა სასამართლოში. დაცვის მხარის მტკიცებულება, ეს ჩხრეკის ოქმი და ამოღებული ნივთები, მოცემული გარემოება უნდა შეაფასოს მოსამართლემ, რამდენად არსებითი დარღვევა იყო ეს გარემოება. ბრალდების მხარე არ თვლის, რომ რამე არსებითი დარღვევა იყო“, - განაცხადა საქმის პროკურორმა, ვასილ სამხარაძემ.

გიორგი რურუა 2019 წლის 18 ნოემბერს დააკავეს. გამოძიება მას სსკ-ის 236-ე მუხლის მესამე და მეოთხე ნაწილებით გათვალისწინებულ დანაშაულს ედავება, რაც ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.

11 ივნისს საქალაქო სასამართლომ „მთავარი არხის“ ერთ-ერთი დამფუძნებლი პატიმრობაში დატოვა.