imedi /  18 აპრილი 2017, 20:20 / სანდო წყარო

მეუფე იაკობი პატრიარქის მკვლელობის მცდელობის ვერსიაზე საუბრობს

პატრიარქის ქორეპისკოპოსი, მეუფე იაკობი პატრიარქის მკვლელობის მცდელობაზე საუბრობს. ვერსია, რომელზეც მღვდელთმთავარმა ქადაგებისას მრევლთან ისაუბრა, პროკურატურის ოფიციალური ბრალისგან რადიკალურად განსხვავდება, თუმცა, ქორეპისკოპოსის თქმით, ის საქმეში ჩახედულია და იცის. ქორეპისკოპოსი იმასაც ამბობს, რომ უფლის წინაშე უდანაშაულობის პრეზუმფციის დაცვა არ სჭირდება.

"უფალო დიდი მადლობა, რომ აგვარიდე ძალიან მძიმე დანაშაულს, რომლის შედეგადაც უდიდესი წყევლა გადმოვიდოდა ჩვენს ერზე, რომ მოგვეკლა ჩვენი პატრიარქი. ამას იმიტომ ვამბობ, რომ თავიდან ბოლომდე ჩახედული ვარ. თუ შეინანებენ, აბსოლუტურად არავინ არ ვიქნებით ისეთი ადამიანები, რომლებიც, სინანულის მერე გვერდში არ დავუდგებით და ჩვენც ვიტვირთავთ მერე მაგ უმძიმეს დანაშაულს", - განაცხადა მეუფე იაკობმა ქადაგებისას.

მეუფე იაკობის ქადაგებას საპატრიარქოს იურისტი განმარტავს. ედიშერ ქარჩავა ამბობს, რომ მას პატრიარქის ქორეპისკოპოსის მიერ ამბიონიდან ნათქვამ სიტყვებში ეჭვის შეტანის საფუძველი არ აქვს.

"მეუფე პროკურატურის ვერსიას არ ცვლის და არც წინააღამდეგობაში მოდის. მას, როგორც მღვდელმთავარს, უფლება აქვს, მოუწოდოს სასულიერო პირს სინანულისკენ. საქმე კი არის შორენა თეთრუაშვილის მკვლელობის მომზადების მცდელობაზე აღძრული, მაგრამ ეს სულაც არ გამორიცხავს, რომ თუნდაც სხვა პირების მიმართაც ყოფილიყო ეს დანაშაული მიმართული. მღვდელმთავარსაც აქვს თავისი პოზიცია, რომ გარკვეულ მტკიცებულებებს და ფაქტებს მისცეს თავისი შეფასება. მე მეუფის ამ სიტყვებში ეჭვის შეტანის საფუძველი არ მაქვს და შესაძლებელია, გარკვეულწილად ვეთანხმებოდე კიდეც", - ამბობს ქარჩავა.

რაც შეეხება ბრალდებული დეკანოზის დაცვის მხარეს, ადვოკატი მიხეილ რამიშვილი მეუფე იაკობის პროკურატურისთვის მიცემულ ჩვენებას იხსენებს და ამბობს, რომ მისი ჩვენებიდან მამა გიორგის ბრალეულობა არ იკვეთება. "თუ გავითვალისწინებთ, რომ მეუფე შენდობისკენ ურჩევს სვლას მამა გიორგის, ეს ახლოსაა პროკურატურის პოზიციასთან - დანაშაულის აღიარებასთან, რაც ჩემთვის გასაკვირია", - განაცხადა რამიშვილმა.

დეკანოზი გიორგი მამალაძე 2017 წლის 10 თებერვალს დააკავეს. საქართველოს მთავარი პროკურატურის განცხადებით, ის მკვლელობის მომზადების ფაქტზეა დაკავებული. უწყების ინფორმაციით, გამოძიება 2017 წლის 2 თებერვალს ერთ-ერთი მოქალაქის განცხადების საფუძველზე დაიწყო, რომელმაც საქართველოს პროკურატურას მიმართა და მიუთითა, რომ მისმა ნაცნობმა მამა გიორგი მამალაძემ სთხოვა სიცოცხლისთვის საშიში შხამიანი ნივთიერების - ციანიდის მოძიებაში დახმარება, რომლის გამოყენებითაც ამ უკანასკნელს მაღალი იერარქიის სასულიერო პირი უნდა მოეწამლა. 

კომენტარები ()