ბესელია და კახიძე მოსმენების კანონზე ერთმანეთს დაუპირისპირდნენ

პარლამენტში, ადამიანის უფლებათა დაცვისა და სამოქალაქო ინტეგრაციის კომიტეტის სხდომა, სადაც ე.წ. „მოსმენების კანონში“ შესატან ცვლილებებს განიხილავენ,  ხმაურის ფონზე მიმდინარეობს.

ეკა ბესელიასა და ოთარ კახიძეს შორის დაპირისპირება საგამოძიებო მოქმედებებთან დაკავშირებული საკანონმდებლო პაკეტის განხილვას მოჰყვა. განხილვაზე იურიდიულ საკითხთა კომიტეტის თავმჯდომარე ეკა ბესელიამ ფრაქცია "ევროპული საქართველოს" წევრ ოთარ კახიძეს მოძალადე უწოდა: „საკუთარი მოქალაქეების ამომჟუჟავი ხარ. ვინც შენ და ადეიშვილს გადაგირჩათ, ისინი გავათავისუფლეთ“, - განაცხადა ეკა ბესელიამ.

საპასუხოდ, ფრაქცია „ევროპული საქართველოს“ წევრმა იურიდიული კომიტეტის თავმჯდომარე ცილისწამებაში დაადანაშაულა: „თქვენ ხართ ცილისმწამებელი. თქვენი პირადი პასუხისმგებლობაა ოთხოზორიას მკვლელობა და ის, რომ რუსეთი ჩვენი ჯარისკაცების დევნას ახორციელებს. უმრავლესობა ცდილობს შემოგვასაღოს კანონპროექტი, რომელსაც აკონტროლებს და მართავს სუს-ი. სუს-ის ხელში აღმოჩნდება ყველა ბერკეტი და დაიწყება უკონტროლო მოსმენები", - განაცხადა ოთარ კახიძემ. მისი თქმით " ევროპული საქართველოს" შეთავაზება ემთხვევა არასამთავრობოების წინადადებას, რომლის მიხედვითაც უნდა შეიქმნას დამოუკიდებელი სააგენტო.

შეგახსენებთ, რომ პარლამენტის იურიდიულ საკითხთა კომიტეტმა, ფარული მოსმენების საკითხზე კანონში გასატარებელ ცვლილებებთან დაკავშირებით, სამუშაო ჯგუფი იანვარში შექმნა. ჯგუფის მიზანია იმსჯელოს იმ საკანონმდებლო ცვლილებებზე, რომელიც ე.წ. „მოსმენების კანონში“ 2017 წლის 31 მარტამდე უნდა შევიდეს. ფარულ საგამოძიებო მოქმედებებთან დაკავშირებით პარლამენტის მიერ 2014 წელს მიღებული საკანონმდებლო პაკეტი და დებულებები საკონსტიტუციო სასამართლომ, კამპანია „ეს შენ გეხება“-ს სარჩელის საფუძველზე, არაკონსტიტუციურად ცნო. კანონმდებლებს 2017 წლის 31 მარტამდე აქვთ ვადა, რათა ფარულ საგამოძიებო მოქმედებებთან დაკავშირებით კანონში ცვლილებები შეიტანონ.