ყარამანიშვილები არ ეთანხმებიან გვარამიას ინიციატივას შუამავალი შპს-ს შექმნის შესახებ

ლევან ყარამანიშვილი "რუსთავი 2"-ის წილების ტელეკომპანიის ჟურნალისტებისთვის გადაცემაზე, ნიკა გვარამიას განცხადებას პასუხობს.

"დღეს ნიკა გვარამიას მიერ წამოყენებულ იქნა ახალი მოთხოვნა, რომ შეიქმნას გაურკვევლი შუამავალი შპს, რომელიც კოლექტივის ნაცვლად ჩაერთვება მოლაპარაკებებში. ითქვა, რომ ამ შპს-ში შეიძლება იყოს 20-30 ან 50 დამფუძნებელი (ანუ ტელეკომპანიის ამჟამინდელი თანამშრომლების მაქსიმუმ 5%). დაიწყო უცნაური მინიშნებები, რომ შესაძლოა რომელიმე თანამშრომელი გადავიდეს გაუგებარ "მეორე მხარეს". გუნდის მხარეებად დაყოფა იმ უპრეცედენტო გარე წნეხის პირობებში, რომელშიც ვიმყოფებით, არაგონივრული და დამაზიანებელია", - წერს Facebook-ზე ყარამანიშვილი.

23 მარტს, ტელეკომპანია "რუსთავი 2"-ის მფლობელებმა ძმებმა ყარამანიშვილებმა განცხადება გაავრცელეს, რომელშიც ყარამანიშვილები ტელევიზიის თანამშრომლებს კომპანიის 40%-იან წილის გადაცემას სთავაზობდნენ. მოგვიანებით, "რუსთავი 2"-ის გენერალურმა დირექტორმა ნიკა გვარამიამ, არხის დამფუძნებლების შეთავაზებაზე უარი განაცხადა და თქვა, რომ 40%-იანი წილის დათმობა არსობრივად საქმის ვითარებას არ ცვლიდა, რადგან გადამწყვეტი ხმის უფლება ისევ ტელეკომპანია "საქართველოს" დარჩებოდა. 24 მარტს, ძმებმა ყარამანიშვილებმა ახალი განცხადება გაავრცელეს, რომლის თანახმადაც, ისინი მზად იყვნენ მიეცათ "რუსთავი 2"-ის წილის საკონტროლო პაკეტი ტელევიზიის თანამშრომლებისთვის. ამ ინიციატივაზე, ნიკა გვარამიამ ახალი მოთხოვნა წამოაყენა, რაც შუამავალი შპს-ს შექმნას გულიხსმობს, რომელშიც არხის 20-დან 50-მდე თანამშრომელი შევიდოდა, რომელიც გადაცემულ წილებზე იქნებოდა პასუხისმგებელი.