დვალი და აქიმიძე: რუსთავი 2-ით "ოცნება" და "ნაციონალები" ვაჭრობენ

ტელეკომპანია "რუსთავი 2"-ის შემქნელები და დამფუძნებლები ფიქრობენ, რომ ბოლო დროს არხის ირგვლივ შექმნილი სიტუაცია არის ტელეკომპანიით ვაჭრობა "ქართულ ოცნებასა" და “ნაციონალებს” შორის". დავით დვალის და ჯარჯი აქიმიძის განცხადების სრულ ვერსიას ჟურნალი "ლიბერალი" აქვეყნებს.

"ბოლო პერიოდში ამ პროცესმა განსხვავებული ელფერი შეიძინა.  თუკი  აქამდე საქმეს, ასე ვთქვათ, ორი ძირითადი პოლუსი ჰქონდა, ერთი მხრივ, რუსთავი-2-ის დამფუძნებელი კანონიერი მფლობელებისა და მეორე მხრივ, მათი მძარცველი “ნაციონალური მოძრაობის” სახით, ახლა სცენაზე ახალი მოქმედი პირები გამოჩნდნენ. 

პირველ რიგში, სასამართლოში რუსთავი-2-ზე პრეტენზია განაცხადა შუალედურმა დროებითმა მფლობელმა ქიბარ ხალვაშმა. ჩვენ სრულიად არ გამოვრიცხავთ, რომ იგი მართლაც წარმოადგენდეს “ნაციონალური მოძრაობის” მთავრობის მიერ უკანონოდ დროებით გამოყენებულ და შემდეგ ასევე უკანონოდ დაზარალებულ მხარეს. ამ მხრივ, ჩვენ  აბსოლუტურად თანავუგრძნობთ მას, ისევე, როგორც  რეჟიმის სხვა უამრავ მსხვერპლს. მაგრამ ამავე დროს ყველამ უნდა გაიაზროს, რომ სამართლიანობის აღდგენა რუსთავი-2-ის საქმეში შეუძლებელია შემოიფარგლოს მხოლოდ  შუალედური მფლობელის ინტერესების აღდგენით, მაშინ, როდესაც დანაშაულის პირველი მსხვერპლი სრულიად იგნორირებულია პოლიტიკოსებისა და სამართალდამცველების მიერ.  

მეორე გარემოება, რომელმაც მოქმედი გმირების გამრავლება გამოიწვია, არის პროცესები “ნაცმოძრაობის” შიგნით, რამაც ამ მოძრაობის, მინიმუმ, ორ ფრთად გაყოფა გამოიწვია. სრული ინფორმაციის ფლობის გარეშე რთულია იმაზე ლაპარაკი, თუ რამდენად არაფორმალურია ეს გაყოფა, თუმცაღა ის ოფიციალურად გაფორმებულია. შესაბამისად, გასაგებია, რომ ადრე თუ გვიან, აუცილებლად დადგებოდა რუსთავი-2-ის ამ ორი ძალის მიერ გაყოფის საკითხი.

და ბოლოს, რუსთავი-2-ის საქმეში დაინტერესებულ მხარედ აშკარად იკვეთება დღევანდელი მთავრობა. ამის უტყუარი საბუთი არის სწორედ ის, რომ უკვე 5 წელია პროკურატურა იგნორირებას უკეთებს დამფუძნებლების ლეგიტიმურ მოთხოვნას საქმის გამოძიების დასკვნის გამოქვეყნების შესახებ. ასევე ამას ადასტურებს დამფუძნებლების სრული იგნორირება მმართველი ძალის პოლიტიკოსების მიერ.", - აცხადებენ დავით დვალი და ჯარჯი აქიმიძე.

"რუსთავი 2"-ის წილებზე სამართლებრივი დავა მეორე წელია მიმდინარეობს. არხის დამფუძნებლები, დავით დვალი და ჯარჯი აქიმიძე, აცხადებენ, რომ მათ ვარდების რევოლუციიდან მალევე "ნაციონალური მოძრაობის" ლიდერებმა წილები ძალით დაათმობინეს. წილის სამართლებრივი გზით დაბრუნებას ცდილობს ბიზნესმენი ქიბარ ხალვაში.

სამართლებრივი დავა აქტიურ ფაზაში "ქართული ოცნების" ხელისუფლებაში მოსვლის შემდეგ შევიდა. "რუსთავი 2"-ის დირექტორი და წარმომადგენლები, რომლებიც არ მალავენ, რომ არხის სარედაქციო პოლიტიკა თანხვედრაშია "ნაციონალური მოძრაობის" ღირებულებებთან და ეფუძნება მმართველი გუნდის მკაცრ კრიტიკას, აცხადებენ, რომ ხელისუფლება ცდილობს არხის გაჩუმებას, ყველა გზით და აპირებს ტელეკომპანიის ხელში ჩაგდებას, ხალვაშის გამოყენებით.

მთავრობა ბრალდებებს უარყოფს და აცხადებს, რომ "რუსთავი 2"-ის მენჯმენტი სამართლებრივი დავის პოლიტიკურ ჭრილში წარმოჩენას ცდილობს და არხს მიზანმიმართული კამპანიებით სასამართლო სისტემაზე და მოსამართლეებზე ზეწოლისთვის იყენებს.

2 მარტს საქართველოს უზენაესი სასამართლოს დიდმა პალატამ ტელეკომპანია "რუსთავი 2" ქიბარ ხალვაშს მიაკუთვნა. 3 მარტს, "რუსთავი 2"-ის მიმართვის საფუძველზე, სტრასბურგის სასამართლომ უზენაესი სასამართლოს გადაწყვეტილების აღსრულება შეაჩერა.

23 მარტს, ტელეკომპანია "რუსთავი 2"-ის მოქმედმა მფლობელებმა ძმებმა ყარამანიშვილებმა განცხადება გაავრცელეს, რომელშიც ისინი ტელევიზიის თანამშრომლებს კომპანიის 40%-იან წილის გადაცემას სთავაზობდნენ. მოგვიანებით, "რუსთავი 2"-ის გენერალურმა დირექტორმა ნიკა გვარამიამ, არხის დამფუძნებლების შეთავაზებაზე უარი განაცხადა და თქვა, რომ 40%-იანი წილის დათმობა საქმის ვითარებას არსებითად არ ცვლიდა, რადგან გადამწყვეტი ხმის უფლება ისევ ტელეკომპანია "საქართველოს" დარჩებოდა. 24 მარტს, ძმებმა ყარამანიშვილებმა ახალი განცხადება გაავრცელეს, რომლის თანახმადაც, ისინი მზად იყვნენ მიეცათ "რუსთავი 2"-ის წილის საკონტროლო პაკეტი ტელევიზიის თანამშრომლებისთვის. ამ ინიციატივაზე, ნიკა გვარამიამ ახალი მოთხოვნა წამოაყენა, რაც შუამავალი შპს-ს შექმნას გულისხმობს, რომელშიც არხის 20-დან 50-მდე თანამშრომელი შევიდოდა. ისინი გადაცემულ წილებზე იქნებოდნენ პასუხისმგებელნი. 
ძმები ყარამანიშვილების შეფასებით კი შპს-ს შექმნა კომპანიისთვის არაგონივრული და დამაზიანებელია. დღესვე, "რუსთავი 2"-ის თანამშრომლებმა განაცხადეს, რომ შპს "რუსთავი 2 ჩემია"-ს ქმნიან. საკითხს ყოფილი პრეზიდენტი მიხეილ სააკაშვილიც გამოეხმაურა.