„ოქროს ბურთის“ ვებ-გვერდი: ხვიჩა კვარაცხელია - როგორ დაიპყრო „კვარადონამ“ ევროპა

„ოქროს ბურთის“ ვებგვერდი ქართელ ფეხბურთელზე ხვიჩა კვარაცხელიაზე ვრცელ სტატიას სათაურით „ხვიჩა კვარაცხელია - როგორ დაიპყრო „კვარადონამ“ ევროპა“ ავრცელებს.

სტატიაში აღნიშნულია, რომ „პარი სენ-ჟერმენში“ გატარებულმა ბრწყინვალე სეზონმა ხვიჩა კვარაცხელია 2026 წლის „ოქროს ბურთის“ ნომინანტთა შორის მოახვედრა. ქართველისთვის ეს პრესტიჟულ ჯილდოზე წარდგენის უკვე მესამე შემთხვევაა. ასე ვითარდებოდა მისი 2025/26 წლების სეზონი და მისი გზა ევროპული ფეხბურთის მწვერვალისკენ...

ხვიჩა კვარაცხელიას ბრწყინვალე პერიოდი უდგას.

2026 წლის აპრილში, ერთ-ერთ ყველაზე დაძაბულ და სანახაობრივ ევროპულ მატჩში, რომელიც ფეხბურთის გულშემატკივრებს დიდი ხნის განმავლობაში ემახსოვრებათ, ქართველმა ვინგერმა მიუნხენის „ბაიერნს“ ორი გოლი გაუტანა და ამით ჩემპიონთა ლიგის ერთ გათამაშებაში „პარი სენ-ჟერმენის“ ფეხბურთელებში შედეგიანობის თვალსაზრისით საკლუბო რეკორდიც დაამყარა.

შვიდი დღის შემდეგ, საპასუხო შეხვედრაში კვარაცხელიამ PSG-ის პირველი გოლის დროს შესანიშნავი გადაცემა გააკეთა და გახდა პირველი ფეხბურთელი, რომელმაც ჩემპიონთა ლიგის ზედიზედ შვიდ მატჩში შეძლო გოლის გატანა ან საგოლე პასის გაკეთება, აღნიშნულია სტატიაში.

კიდევ ერთი კვირის შემდეგ მისმა მორიგმა გოლმა „პარი სენ-ჟერმენს“ „ლანსთან“ გამარჯვებით საფრანგეთის ჩემპიონობა მოუტანა.

შესაბამისად, აპრილი ქართველისთვის განსაკუთრებით წარმატებული გამოდგა. კვარაცხელია PSG-ს 2025 წლის იანვარში, 80 მილიონ ევროდ შეუერთდა და ყველაფერი იმაზე მიუთითებს, რომ ეს ტრანსფერი მის კარიერაში დაუვიწყარი წლისკენ გადადგმული უმნიშვნელოვანესი ნაბიჯი შეიძლება აღმოჩნდეს.

მაისის ბოლოს, უნგრეთში „არსენალის“ წინააღმდეგ ჩემპიონთა ლიგის ფინალში კიდევ ერთი გოლი ან საგოლე გადაცემა კვარაცხელიას ამ ტურნირზე სეზონში საგოლე მოქმედებების რაოდენობას 11-მდე გაუზრდიდა. ჩემპიონთა ლიგის ერთ სეზონში ამ ნიშნულისთვის აქამდე მხოლოდ ორ ფეხბურთელს მიუღწევია - კრიშტიანუ რონალდუსა და ქარიმ ბენზემას.

ორივე მათგანმა ამის შემდეგ „ოქროს ბურთი“ აიღო..

ელეგანტურობა და აგრესია - დამანგრეველი სინთეზი

თბილისში, საქართველოს დედაქალაქში, რომელიც მტკვრის სანაპიროზეა გაშენებული, დაბადებული და გაზრდილი კვარაცხელია, უპირველესად, ფეხბურთით სიამოვნების მინიჭებისთვის შექმნილი მოთამაშეა, წერს გამოცემა.

ის დრიბლინგით, მოტყუების მოძრაობებითა და ორივე ფეხის თანაბარი სიზუსტით თამაშობს, რის გამოც, სანამ ბურთი მის ფეხებთანაა, მეტოქისთვის შეუძლებელია წინასწარ გამოიცნოს, რას გააკეთებს.

კვარას შეუძლია პირდაპირ წავიდეს შეტევაზე და სისწრაფეში ყველაზე სწრაფ მცველებსაც კი აჯობოს. მისი სირბილის მანერა თითქოს ურთიერთსაწინააღმდეგო თვისებებს აერთიანებს - ერთდროულად მოხდენილიცაა და თითქოს უწესრიგოც. მის მოძრაობას ყველაზე მეტად ელეგანტური, მსუბუქი სირბილი აღწერს.

ამასთანავე, მას შეუძლია დროულად დაარტყას ან ჩააწოდოს, რადგან ზუსტი დარტყმისა თუ გადაცემისთვის წინასწარ მომზადება არ სჭირდება.

მისი თამაში ერთდროულად დამანგრეველიცაა და გონივრულიც. სწორედ ამიტომ, გასაკვირი არ არის, რომ „ნაპოლის“ გულშემატკივრებმა ქართველს უდიდესი პატივი მიაგეს და დიეგო მარადონას შეადარეს, როდესაც ის ნეაპოლში სერია A-ს მცველებს ანადგურებდა.

ის „კვარადონა“ გახდა - ფეხბურთელი, რომელსაც, ყველა დროის ერთ-ერთი უდიდესი მოთამაშის მსგავსად, თითქოს არაფრისგან შეუძლია ჯადოსნური მომენტის შექმნა.

თუმცა, ერთი შეხედვით შეუძლებელი ასეთი ილეთები ხშირად ეპიზოდურია. რისკზე წასვლის მოყვარულ ვინგერებთან სწორედ ეს არის გარიგება - გულშემატკივარი მათ საუკეთესო მომენტებს აღფრთოვანებით უყურებს და შემდეგ თამაშის გარკვეულ მონაკვეთებში ნაკლებად აქტიურობისთვისაც პატიობს.

მაგრამ კვარაცხელიას სხვებისგან მისი თანმიმდევრული შემოქმედებითობა გამოარჩევს - უნარი, უმაღლეს დონეზე ითამაშოს და გუნდისთვის რეალური სარგებელი კვირიდან კვირამდე შექმნას.

ბოლო ერთი წლის სტატისტიკაც ამას ადასტურებს: კვარაცხელია ყოველ 90 წუთში საშუალოდ 11,7 პროგრესულ გარბენს და 5,3 წარმატებულ მოტყუებას ასრულებს.

25 წლის ქართველს მატჩში საშუალოდ 2,3 ორთაბრძოლის მოგება აქვს დაცვაში - მაჩვენებელი, რომელიც ჩვეულებრივ მცველებისთვის არის დამახასიათებელი და მისი შრომისმოყვარეობის საუკეთესო დასტურია. შეტევაში კი მისი საშუალო მაჩვენებელი 2.2 საკვანძო პასია.

და, რა თქმა უნდა, არის გოლები და საგოლე გადაცემები - ზუსტი ჩაწოდებები და უნაკლო დარტყმები, რომლებიც მუდმივად ხვდებიან საფეხბურთო სამყაროს ყურადღების ცენტრში.

თუმცა, ეს უკვე ვიცით.

როდესაც PSG-მ 2025 წლის დასაწყისში კვარაცხელიას სანაცვლოდ კოლოსალური თანხა გადაიხადა, მას გუნდის გამორჩეული ლიდერის როლი უნდა აეღო მესის, მბაპესა და ნეიმარის ეპოქის შემდეგ.

მან ამ ვალდებულებას უდავოდ გაართვა თავი.

ფეხზე მყარად დგომა

ვინც კვარაცხელიას კარგად იცნობს, მის შესახებ საუბრისას იმ თვისებებს გამოყოფს, რომლებიც მას თითქმის იდეალურ სიძედ აქცევს.

ის თავმდაბალი და გულუხვია. პატრიოტია — ღრმად უყვარს საკუთარი სამშობლო, თუმცა ეს სიყვარული ნაციონალიზმს კი არა, უბრალოდ სიამაყეს ეფუძნება. მისთვის ოჯახზე მნიშვნელოვანი არაფერია და ცხოვრებისეული მიზნების მისაღწევად წარმოუდგენლად ბევრს შრომობდა.

ყველაზე კარგად ის ფაქტი მეტყველებს მის ხასიათზე, რომ მისი დღევანდელი საუკეთესო მეგობრები სწორედ ის ადამიანები არიან, ვისთან ერთადაც ბავშვობაში, იმ ჩვეულებრივი საცხოვრებელი კორპუსის წინ, სადაც მისი ოჯახი ცხოვრობდა, ბურთს ათამაშებდა.

ასეთი ღირებულებები სწორედ იმ სახლში ჩამოუყალიბდა, მშობლებისა და ძმების გარემოცვაში. მათ შეინარჩუნებინეს მისთვის მიწაზე მყარად დგომის უნარი მაშინაც კი, როდესაც 16 წლის ასაკში საფეხბურთო ნიჭისთვის ეროვნული ჯილდო მიიღო.

იგივე თვისებები დაეხმარა, რეალობის შეგრძნება არ დაეკარგა მაშინაც, როდესაც „დინამო თბილისის“ მაისურით ნაადრევად გაბრწყინებამ მოსკოვის „ლოკომოტივში“ გადაიყვანა. ეს იჯარით გადასვლა მის ცხოვრებაში რამდენიმე მიზეზით აღმოჩნდა გარდამტეხი, რომელთაგან ერთ-ერთი დღემდე განსაკუთრებით მტკივნეულ მოგონებად რჩება.

პირველ რიგში, კვარაცხელიას ოჯახისგან 2 000 კილომეტრის დაშორებით მოუწია ცხოვრება — ცვლილება, რომელსაც დიდი გამბედაობა სჭირდებოდა.

შემდეგ კი იყო ხელფასის მკვეთრი ზრდა, რომელთან შეგუებაც ასევე ახალი გამოცდილება აღმოჩნდა. ცხოვრებაში პირველად კვარაცხელია მდიდარი გახდა.

შემდეგ კი მამა ავად გახდა. ძალიან მძიმედ.

მოზარდი ფეხბურთელი მაშინვე საქართველოში დაბრუნდა და მამის სიცოცხლის გადასარჩენად გადაუდებელი ოპერაციის ხარჯები თავად დაფარა.

ბადრი კვარაცხელია, მისი მამა და, არანაკლებ მნიშვნელოვანია, ყოფილი პროფესიონალი ფეხბურთელი, დღემდე შვილის ყველაზე დიდი გულშემატკივარი და მისი მთავარი საყრდენია.

მოლოდინების გადაჭარბება - ვარსკვლავი დაიბადა

შემდეგ იყო „რუბინ ყაზანი“, სადაც ფეთქებადმა ვინგერმა თავი ბრწყინვალედ წარმოაჩინა და ზედიზედ ორი სეზონის განმავლობაში რუსეთის პრემიერლიგის წლის საუკეთესო ახალგაზრდა ფეხბურთელის ჯილდო მოიგო.

შემდეგ კი კიდევ ერთი დაბრკოლება - ამჯერად გეოპოლიტიკური.

რუსეთის მიერ უკრაინაში შეჭრის დაწყების შემდეგ უცხოელი ფეხბურთელების კონტრაქტები შეჩერდა, რაც მათ სხვა კლუბებში გადასვლის შესაძლებლობას აძლევდა.

მიუხედავად უფრო დიდი კლუბების ინტერესისა, კვარაცხელია საქართველოში დაბრუნდა.

ეს ყველაფერი 2022 წელს შეიცვალა, როდესაც „ნაპოლიმ“ ქართველი გაიფორმა.

იტალიაში მისი წარმატების ახსნისთვის ბევრი მიმართულების განხილვა შეიძლება, თუმცა, ალბათ, ერთი ამბავი ყველაზე კარგად გადმოსცემს იმ სიყვარულს, რომელიც მან ნეაპოლში დაიმსახურა.

ამბობენ, რომ იტალიაში გატარებული სამი წლის განმავლობაში ნეაპოლში მცხოვრებ არც ერთ ქართველს რესტორანში ჭამის შემდეგ ერთი ევროც კი არ გადაუხდია.

იტალიაში გატარებული სამი წლის განმავლობაში ხვიჩა კვარაცხელია უმაღლესი დონის შემტევ ფეხბურთელად ჩამოყალიბდა და „ნაპოლის“ ორი საჩემპიონო ტრიუმფის ერთ-ერთ მთავარ მამოძრავებელ ძალად იქცა.

ის იყო „კვარადონა“.

ის იყო „კვარავაჯო“.

და ის ყველას უყვარდა.

შემდეგ კი დადგა ტრანსფერი.

დიდი ტრანსფერი.

გარდამტეხი ნაბიჯი კარიერაში.