სალომე ზურაბიშვილი ფერმერებს: მე ვიქნები თქვენი ელჩი საექსპორტო ბაზარზე

მმართველი გუნდის მიერ მხარდაჭერილი დამოუკიდებელი პრეზიდენტობის კანდიდატი სალომე ზურაბიშვილი გორში ფერმერებს შეხვდა.

სალომე ზურაბიშვილმა ფერმერებს სიტყვით მიმართა და საკუთარი ხედვა გააცნო. მისი თქმით, შიდა ქართლის რეგიონი არის ერთ-ერთი ძლიერი რეგიონი და იმ საწარმოს არსებობა, რომელიც აწარმოებს ბიოპროდუქციას არის მნიშვნელოვანი საქართველოსთვის. პრეზიდენტობის კანდიდატის განცხადებით, ქვეყანაში თუ არ იქნება ძლიერი რეგიონი, ქვეყანაც ვერ იქნება ძლიერი და არ შეიძლება ყველაფერი იწყებოდეს და მთავრდებოდეს თბილისში.      

„თქვენ ხართ ძალიან დიდი მაგალითი იმისა თუ რა კეთდება ამ ქვეყანაში და რაც უნდა გაკეთდეს სამომავლოდ. ასეთი საწარმო, რომელიც აწარმოებს ბიოპროდუქციას არის ძალიან მნიშვნელოვანი.ეს არის ჩვენი ქვეყნის მომავალი, რომ ჩვენი პროდუქცია იყოს დაცული, ასევე გარემო იყოს დაცული.ეს რეგიონი არის ერთ-ერთი ძლიერი რეგიონი ხილისა და მისი გადამუშავების კუთხით.მე ყოველთვის ხაზს ვუსვამ იმას, იმას რომ ვიქნები რეგიონების პრეზიდენტი.ქვეყანაში თუ არ იქნება ძლიერი რეგიონი, ქვეყანაც ვერ იქნება ძლიერი.არ შეიძლება ყველაფერი იწყებოდეს და მთავრდებოდეს თბილისში. აუცილებელია გავაძლიეროთ რეგიონი, ისე რომ აქედან არავინ არ მოისურვოს წასვლა,დედაქალაქში და უცხოეთში." 

სალომე ზურაბიშვილის თქმით, ის იქნება მეწარმეების ელჩი საექსპორტო ბაზარზე.

„მე ვიქნები თქვენი ელჩი ექსპორტის ბაზარზე. ჩვენთვის ღიაა მსოფლიო საექსპორტო ბაზარი. ამ კუთხით ვიმუშავებ და მთელ ჩემს წარსულის გამოცდილებას მოვახმარ ამ საქმეს, რომ მივიღოთ კარგი შედეგი ამ სფეროში."

შეხვედრაზე სალომე ზურაბიშვილმა ხაზი გაუსვა მცირე და საშუალო მეწარმეების როლს ქვეყნის განვითარებაში. 

„ფერმერებს მინდა მივმართო,თქვენ ხართ მაგალითი თუ როგორი უნდა იყოს თანამშრომლობა სახელმწიფოსა და კერძო საწარმოებსა და მრეწველებს შორის. სახელმწიფომ თავისთავად ხელი უნდა შეუწყოს მცირე და საშუალო მეწარმეებს, თქვენ ხართ ქვეყნის თავისუფალი ნაწილი. თქვენ უნდა შექმნათ მეტი სამუშაო ადგილი. ასევ ვითარდება ნამდვილი ქვეყნის ხერხემალი. არსებობს ბევრი პროგრამები და ერთ -ერთი არის „აწარმოე საქართველო"-ს პროგრამა, რომლითაც ბევრი ადამიანი კმაყოფილია. მსგავსი პროგრამები უნდა იყოს მეტი. ჩვენ ერთად ვაშენებთ ქვეყანას. მე ვიქნები თქვენი დამცველი, შრომის უსაფრთხოების საკითხებში, სადაც ევროპული სტანდარტები უნდა შემოვიტანოთ, ის რაც არის ევროპის მთავარი ღირებულება ყველამ ერთად ყველაფერი უნდა გავაკეთოთ იმისთვის, რომ ხვალინდელი დღე იყოს უკეთესი საქართველოსთვის."  

შეხვედრას საქართველოს გარემოს დაცვისა და სოფლის მეურნეობის მინისტრი ლევან დავითაშვილიც ესწრებოდა.