სერ ალან დუნკანი სალომე ზურაბიშვილს არჩევნებში გამარჯვებას ულოცავს

საქართველოს საპრეზიდენტო არჩევნების მეორე ტურში გამარჯვებას დამოუკიდებელ საპრეზიდენტო კანდიდატს სალომე ზურაბიშვილს დიდი ბრიტანეთის სახელმწიფო მინისტრი, სერ ალან დუნკანი ულოცავს. ამის შესახებ მან მიკრობლოგ Twitter-ზე დაწერა.

დუნკანი მიესალმება არჩეული პრეზიდენტის სურვილს გააერთიანოს საზოგადოება და შეინარჩუნოს დემოკრატიის სტანდარტები. 

„ვულოცავ სალომე ზურაბიშვილს საქართველოს საპრეზიდენტო არჩევნებში გამარჯვებას. დიდი ბრიტანეთი და საქართველო სტრატეგიული პარტნიორები არიან. მივესალმები არჩეული პრეზიდენტის სურვილს გააერთიანოს საზოგადოება და შეინარჩუნოს დემოკრატიის სტანდარტები, რომლებსაც ქართველი ხალხი მოითხოვს და იმსახურებს“, - წერს სერ ალან დუნკანი. 

Congratulations to Salome Zourabichvili, elected as Georgia’s next President. The #UK & #Georgia are strategic partners. I welcome the President-elect’s determination to bring society together and to uphold the democratic standards which the people of Georgia demand and deserve.

— Sir Alan Duncan MP (@AlanDuncanMP) November 29, 2018

ცენტრალური საარჩევნო კომისიის წინასწარი მონაცემებით, საპრეზიდენტო არჩევნების მეორე ტურში ქართული ოცნების მიერ მხარდაჭერილ კანდიდატ სალომე ზურაბიშვილს ხმების 59.55% ანუ 1 146 248 ხმა, ხოლო ნაციონალური მოძრაობის კანდიდატ გრიგოლ ვაშაძეს 40.45% ანუ 778 464 ხმა აქვს.

ამ დროისთვის 3705 საარჩევნო უბნიდან დათვლილია 3694 უბანი, რაც საარჩევნო უბნების 99.7%-ია.

პირველი ტური 28 ოქტომბერს გაიმართა. ცესკოს მონაცემების თანახმად, „ქართული ოცნების“ მიერ მხარდაჭერილმა დამოუკიდებელმა კანდიდატმა სალომე ზურაბიშვილმა ხმების 38.64% მიიღო, „ნაციონალური მოძრაობის“ კანდიდატმა გრიგოლ ვაშაძემ - 37,74%.

2018 წლის საპრეზიდენტო არჩევნების მეორე ტურის საბოლოო შედეგებს შეგიძლიათ გაეცნოთ ამ ბმულზე.