დეკანოზი შალვა კეკელია: მივმართავ ეკლესიურ ადამიანებს, როგორ უნდა მისცეთ ხმა იმ პარტიებს, რომლებიც შენი მოძღვრის, შენი პატრიარქის და შენი დედა ეკლესიის მაგინებელია და მისთვის ეკლესია არაფერს არ წარმოადგენს

მივმართავ მხოლოდ ეკლესიურ ადამიანებს, როგორ უნდა მისცეთ იმ პარტიებს ხმა, რომლებიც შენი მოძღვრის, შენი პატრიარქის და შენი დედა ეკლესიის მაგინებელია და მისთვის ეკლესია არაფერს არ წარმოადგენს. ჩვენ ყველა რა არჩევანსაც გავაკეთებთ ამაზე პასუხისმგებლობა უნდა ავიღოთ. ღმერთმა შეგაძლებინოთ, რომ სწორი არჩევანი გააკეთოთ,- განაცხადა დეკანოზმა შალვამ (კეკელია).

„ძალიან ბევრი ადამიანი მირეკავს და აზრს მეკითხება არჩევნებთან დაკავშირებით. მეკითხებიან ვის მივცეთ ხმა და როგორ მოვიქცეთო. ადამიანები, ვინც არჩევნებში მონაწილეობას იღებენ სრულწლოვანები არიან, ყველას გვაქვს ჩვენი გონება, ჩვენი აზრი და ეს ჩვენ უნდა გადავწყვიტოთ,

ჩვენ უნდა შევხედოთ რა პროცესებია ქვეყანაში, ვის რა დამოკიდებულება აქვს ქვეყანასთან, ერთან, სარწმუნოებასთან, ეკლესიასთან და აქედან გამომდინარე უნდა მივიღოთ გადაწყვეტილება ვის უნდა მივცეთ ხმა.

მე 46 წლის ვარ და მხოლოდ ერთ არჩევნებში მაქვს მონაწილეობა მიღებული. 2012 წელს წავედი არჩევნებზე, რადგან მაშინ ვხვდებოდი რომ ძალიან დიდი ბოროტება ხდებოდა ქვეყანაში და ვეღარ ვეგუებოდით ამ სიბოროტეს, სიბნელეს, მკვლელობას, შევიწროებას, ციხეებში ადამიანების გაუპატიურება. ამ ყველაფრის მიმართ მქონდა პროტესტი, წავედი და ხმა მივეცი სხვა პარტიას, რადგან უნდა დამთავრებულიყო ის საშინელება, რაც ქვეყანაში ხდებოდა.

წელსაც გადავწყვიტე, რომ მივიღო არჩევნებში მონაწილეობა. მივდივარ სამეგრელოში ხმის მისაცემად, რადგან დღესაც იგივე პროცესია, რაც 2012 წელს იყო. გადამწყვეტი მომენტია, რადგან ჩვენ ვხედავთ რამხელა ზეწოლაა ქვეყანაზე, რაც აქამდე არ ყოფილა.

არ მინდა ერმა მიიღოს ისეთი კანონი, რომელიც ღვთის წინააღმდეგ წავა. აქამდე ღვთის სიყვარულით და ერთგულებით მოვედით და მინდა, რომ ასე გაგრძელდეს მომავალშიც“, - აღნიშნა დეკანოზმა შალვამ (კეკელია).