საერთაშორისო დამკვირვებელი: არ შეიძლება თქმა, რომ არჩევნებზე დარღვევებს ჰქონდა სისტემური ხასიათი. თუ რომელიმე პოლიტიკური ფიგურა ამას აცხადებს, ეს ნიშნავს, რომ პატივს არ სცემს ქართველ ხალხს და მის საარჩევნო ნებას

არ შეიძლება თქმა, რომ არჩევნებზე დარღვევებს ჰქონდა სისტემური ხასიათი. თუ რომელიმე პოლიტიკური ფიგურა ამას აცხადებს, ეს იმას ნიშნავს, რომ ისინი პატივს არ სცემენ არც ქართველ ხალხს და არც მათ საარჩევნო ნებას, - განაცხადა საერთაშორისო დამკვირვებელმა, ესპანეთის სენატის წევრმა, ლუკ ურიბ-ეჩებარია აპალატეგმა გადაცემაში „იმედის კვირა“.

„იმ 5-6 საარჩევნო უბანზე, რომელსაც მე ვეწვიე, ყველაფერი გახლდათ წესრიგში. ამავე დროს აუცილებელია გითხრათ, რომ ვნახეთ რამდენიმე შემთხვევა, სადაც ვნახეთ ნაკლები ტოლერანტობა. აუცილებელია ამ შემთხვევების გამოძიება, პასუხისმგებელი პირების მოძიება და ამ ე.წ. ინციდენტების სრულფასოვანი გამოძიება. ამავე დროს, მინდა ვთქვა, რომ ეს ინციდენტები გახლდათ იზოლირებული, კონკრეტული და სპეციფიკური. ეს შემთხვევები არ ნიშნავს, რომ ამ არჩევნების შედეგები არ არის ლეგიტიმური. ძალიან სერიოზული განცხადებაა იმის თქმა, რომ იყო ზოგადი დარღვევები. ამისათვის საჭიროა კონკრეტული და მყარი მტკიცებულებები. არ შეიძლება უბრალოდ სიტყვაზე ასეთი ბრალდებების წაყენება და აუცილებელია ამ ბრალდებების დასაბუთება. არ შეიძლება თქმა, რომ დარღვევებს ჰქონდა სისტემური ხასიათი. იმ შემთხვევაში, თუ ნებისმიერი პოლიტიკური ფიგურა აცხადებს ამას, ეს იმას ნიშნავს, რომ ისინი პატივს არ სცემენ არც ქართველ ხალხს და არც მათ საარჩევნო ნებას“,- განაცხადა ურიბ-ეჩებარია აპალატეგმა.