კვირიკაშვილი წინასაარჩევნოდ პოლიტიკურ ძალებს და საზოგადოებას მიმართავს

ადგილობრივი თვითმმართველობის არჩევნებამდე 2 დღით ადრე, ქვეყნის პრემიერმინისტრი გიორგი კვირიკაშვილი სახელმწიფო უწყებებს, პოლიტიკურ ძალებსა და საზოგადოებას მიმართავს.

გიორგი კვირიკაშვილი ყველა მხარეს მოუწოდებს, რომ არჩევნები ჩატარდეს ისე, რომ ეს იყოს წინ გადადგმული ნაბიჯი ევროპული დემოკრატიის განმტკიცების გზაზე.

"რამდენიმე დღეში საქართველოში ტარდება თვითმმართველობის მნიშვნელოვანი არჩევნები და დარწმუნებული ვარ, რომ ეს არჩევნები იქნება მორიგი დასტური იმისა, რომ ჩვენს ქვეყანაში განხორციელებული დემოკრატიული რეფორმების, ცვლილებების შედეგად ჩვეულებრივი პრაქტიკა გახდა თავისუფალი და სამართლიანი არჩენების ჩატარება. მინდა კმაყოფილებით აღვნიშნო, რომ წინასაარჩევნო პროცესი იყო უპრეცედენტოდ მშვიდი, ყველა საარჩევნო სუბიექტს ჰქონდა თავისუფალი, მშვიდობიანი საარჩევნო კამპანიის ჩატარების საშუალება, რაც იმას მოწმობს, რომ "ქართული ოცნების" სახით ქვეყანას მართავს პოლიტიკური გუნდი, რომლისთვისაც ძალიან მნიშვნელოვანია თავისუფალი, დემოკრატიული და კონკურენტული არჩევნების ჩატარება ქვეყანაში. სწორედ ამიტომ, მინდა, რომ არჩევნებამდე 2 დღით ადრე მივმართო, პირველ რიგში, სახელმწიფო უწყებებს, ასევე პოლიტიკურ ძალებს და მთლიანად საზოგადოებას, ჩავატაროთ არჩევნები ისე, რომ ეს იყოს ნამდვილად კიდევ ერთი წინ გადადგმული ნაბიჯი ევროპული დემოკრატიის განმტკიცების გზაზე, რათა ერთხელ და სამუდამოდ წარსულს ჩაბარდეს ძალადობრივი არჩევნები და საერთოდ დავიწყებული იქნას სიტყვა, რასაც წარსულში ერქვა გაყალბებული, ძალადობრივი არჩევნები.
ვფიქრობ, რომ ჩვენ ძალიან მნიშვნელოვანი ნაბიჯები გადავდგით ბოლო 5 წლის განმავლობაში - ასეთი საქართველოსა და ასეთი დეოკრატიის შექმნის გზაზე. ასევე, მინდა მოვუწოდო სახელმწიფო უწყებებს, რომ არ მივცეთ არავის საბაბი, რომ თქვას ერთი სიტყვაც კი სახელმწიფო რესურსის გამოყენების შესახებ. მინდა მოვუწოდო ჩვენს მომხრეებს და კიდევ ერთხელ ხაზი გავუსვა იმას, რომ ჩვენი ძლიერება არის სწორედ განსხვავევული აზრის პატივისცემა. ჩვენი უპირატესობა სწორედ ამაში მდგომარეობს და ამაშია სწორედ ის დიდი განსხვავება და ცვლილება, რომელიც ქვეყანაში განხორციელდა 2012 წელს",- განაცხადა გიორგი კვირიკაშვილმა.

საქართველოში თვითმმართველობის არჩევნები 21 ოქტომბერს გაიმართება.