მარტვილის საარჩევნო კომისია ხმებს ხელახლა არ დაითვლის

მარტვილის 65-ე საოლქო საარჩევნო კომისიამ ქართული ოცნების საჩივარი, თვითმმართველი თემის მერის კენჭისყრის შედეგების ხელახლა დათვლის თაობაზე, არ დააკმაყოფილა. მმართველი პარტიის წარმომადგენლები ეჭვობდნენ, რომ ხმების დათვლისას კომისიამ მათი მერობის კანდიდატის, ალექსანდრე გრიგალავას სასარგებლოდ მიცემული ხმები ბათილად მიიჩნია.

მოთხოვნას ასევე საჩივრით უპასუხა “ერთიანმა ნაციონალურმა მოძრაობამ“. იმ შემთხვევაში თუ ბათილი ბიულეტენები დაემატებოდა ქართული ოცნების“ კანდიდატის ხმებს, ყველა უბნის შედეგის გადახედვას და კომისიის თავმჯდომარეების პასუხისმგებლობის საკითხის დაყენებას მოითხოვდნენ. კომისიამ არც ეს საჩივარი დააკმაყოფილა.

სამეგრელო-ზემო სვანეთის მასშტაბით, მარტვილი ერთადერთი მუნიციპალიტეტია, სადაც მერის არჩევნების მეორე ტურია მოსალოდნელი. აქ კანდიდატებმა 50%-იანი ბარიერი ვერ გადალახეს. ამასთან, 23 ოქტომბერს “ერთიანი ნაციონალური მოძრაობის“ სხდომაზე მიიღეს გადაწყვეტილება, რომ პარტია ადგილობრივი თვითმმართველობის არჩევნების მეორე ტურში მონაწილეობას არ მიიღებს.

ცესკოს წინასწარი მონაცემებით, ყველაზე მეტი ხმა, 49,76% „ქართული ოცნების“ მერობის კანდიდატმა ალექსანდრე გრიგალავამ მიიღო. მეორე ადგილზე ენმ-ის კანდიდატი მამუკა დანელიაა 35,81%-ით. მესამე პოზიციაზეა “ევროპული საქართველოს“ კანდიდატი, გიორგი რუხაია (3,82%).

21 ოქტომბერს საქართველოში თვითმმართველობის არჩევნები ჩატარდა. ამ დღეს საქართველოს მოქალაქეებმა ქვეყნის მასშტაბით 64 საკრებულოს 2058 დეპუტატი და 64 მერი პირდაპირი წესით, 4 წლის ვადით აირჩიეს.

ცესკო-ს წინასწარი მონაცემებით, მე-2 ტური 6 მაჟორიტარულ ოლქში ჩატარდება.