ოპოზიცია თბილისის მერის და საკრებულოს არჩევნების შედეგებს სასამართლოში ასაჩივრებს

ოპოზიციური პარტიები თბილისის მერის და თბილისის საკრებულოს არჩევნების შედეგებს სასამართლოში ასაჩივრებენ. საჩივრი თბილისის საქალაქო სასამართლოში რამდენიმე წუთის წინ დარეგისტრირდა.

"დღეს შევიდა ცესკოში რეგიონების სხვადასხვა მუნიციპალიტეტებთან დაკავშირებით საჩივრები, ხოლო თბილისის საქალაქო სასამართლოში, საქართველოში არსებულმა ყველა ოპოზიციურმა პარტიამ ერთად გავასაჩივრეთ თბილისის მერის და თბილისის საკრებულოს არჩევნების შედეგები. ეს არის უპრეცედენტო მოვლენა, როდესაც საქართველოში მთელი ოპოზიციური სპექტრი, მათ შორის ერთმანეთთან ძალიან მწვავედ დაპირისპირებული ოპოზიციური პარტიები, ყველა ერთად აცხადებს, რომ ეს არჩევნები იყო ტოტალურად გაყალბებული. ჩვენ ვითხოვთ ხმების გადათვლას რამდენიმე ასეულ საარჩევნო უბანზე და ვითხოვთ იმის დადგენას, რეალურად რა ხმები მიიღო ქართულმა ოცნებამ", - განაცხადა "თავისუფალი საქართველოს" ლიდერმა კახა კუკავამ.

მისი თქმით, არის უამრავი უბანი, სადაც ოპოზიციას უწერია 0 ხმა, თუმცა ათობით ადამიანი აძლევს ჩვენებას, რომ ხმა მისცა სწორედ ოპოზიციას. კუკავას სასამართლოს ობიექტურობის არ სჯერა და ამბობს, რომ საჭიროების შემთხვევაში ეს საქმე სტრასბურგამდე მივა.

დღესვე, "ნაციონალური მოძრაობის" იურისტმა თბილისის საქალაქო სასამართლოში სარჩელი შეიტანა, რომელიც შემაჯამებელი ოქმების ბათილად ცნობას ეხება.

ცესკოს თავმჯდომარემ თამარ ჟვანიამ 21 ოქტომბერს თბილისის მერის არჩევნებისა და თბილისის საკრებულოს პროპორციული საარჩევნო სისტემით ჩატარებული არჩევნების შედეგების საბოლოო ოქმებს ხელი მოაწერა. საბოლოოდ დადგინდა, რომ თბილისის ახლადარჩეულმა მერმა კახა კალაძემ არჩევნებში ხმათა 51.09% მიიღო. თბილისის საკრებულოში კი პროპორციული სიით "ქართულმა ოცნებამ" 53.15% აიღო, აქედან გამომდინარე მას საკრებულოში 15 მანდატი მიიღო. 

21 ოქტომბერს საქართველოში თვითმმართველობის არჩევნები ჩატარდა.