როენა ხუცურაული თავს დამნაშავედ არ ცნობს და დუმილის უფლებას იყენებს

პროსტიტუციისთვის ადგილის გადაცემის ბრალდებით დაკავებული როენა ხუცურაული თავს დამნაშავედ არ ცნობს და დუმილის უფლებას იყენებს. მისი ადვოკატი არჩილ დვალიშვილი აცხადებს, რომ „მამიდას“ გლდანში მდებარე საკუთარი ფართი ბოლო რამდენიმე წლის განმავლობაში გაქირავებული ჰქონდა, თუმცა მეიჯარე იქ რა საქმიანობას ეწეოდა, არ იცოდა.

ადვოკატი არ გამორიცხავს, რომ შესაძლოა მართლაც პროსტიტუციისთვის იყენებდნენ ადგილს, თუმცა როენა ხუცურაული ამის შესახებ საქმის კურსში არ იყო.

„ბრალდებული თავს დამნაშავედ არ ცნობს და დუმილის უფლებას  იყენებს.  მას გლდანში გააჩნია უძრავი ქონება სასტუმროს სახით და ეს პიროვნების კონსტიტუციური უფლებაა თუ რა სამართლებრივ დატვირთვას მისცემს თავის უძრავ ქონებას. მას ეს რამდენიმე წლის განმავლობაში იჯარით ჰქონდა გადაცემული სხვა პიროვნებისთვის და მის საქმიანობაში არ ერეოდა თუ კონკრეტულად რა ფუნქციით დატვირთა მოიჯარემ. ჩემი დაცვის ქვეშ მყოფს ჰქონდა ამ იჯარიდან შემოსავალი. მისი პოზიციაა, რომ თავს დამნაშავედ არ ცნობს. არანაირი მონაწილეობა მას ამ დანაშაულში არ აქვს. რამდენიმე წლის განმავლობაში იყო ეს ფართი გაქირავებული და ჩემი დაცვის ქვეშ მყოფმა არ იცოდა ფუნქციის შესახებ. თვითონ ასაკში არის, მკურნალობს და არ უწევდა მას სისტემატიურად ობიექტზე გასვლა“,- განაცხადა ადვოკატმა არჩილ დვალიშვილმა.

შინაგან საქმეთა სამინისტროს ცენტრალური კრიმინალური პოლიციის დეპარტამენტმა პროსტიტუციის ხელშეწყობის და პროსტიტუციისთვის ფართის გადაცემის ბრალდებით, თბილისში სულ 3 პირი დააკავეს.

ამ დროისთვის სამივე დაკავებული ქალი მცხეთის წინასწარი დაკავების იზოლატორშია. იმის გამო, რომ თბილისის იზოლატორში ადგილი არ იყო, ხუცურაული და მასთან ერთად დაკავებული ორი პირი მცხეთაში გადაიყვანეს. აღკვეთის ღონისძიების საკითხზე სასამართლო სავარაუდოდ ხვალ იმსჯელებს.