„თიბისი ბანკის“ საქმეზე სასამართლოში სებ-ის თანამშრომელი დაიკითხა

„თიბისი ბანკის“ საქმეზე პროცესი არსებითი განხილვის ეტაპზე გადავიდა. თბილისის საქალაქო სასამართლოში დღეს იკითხება ბრალდების მხარის მოწმე, ეროვნული ბანკის საბანკო ზედამხედველობის დეპარტამენტის უფროსი აკაკი გელაზონია, რომელმაც 2008 წელს განხორციელებული სადავო ტრანზაქცია შეამოწმა.

გელაზონიას თქმით, ტრანზაქციის შემოწმება 2018 წლის 18 სექტემბერს დაიწყო და შემოწმების მიზეზი შესაძლო ინტერესთა კონფლიქტის დადგენა იყო. მისივე თქმით, შემოწმებისას დარღვევები გამოიკვეთა. კერძოდ, როდესაც ამ ტრანზაქციასთან დაკავშირებით „თიბისი ბანკს“ დოკუმენტაციის წარდგენა სთხოვეს, ბანკმა საკმაოდ მნიშვნელოვანი დოკუმენტაცია ვერ წარმოადგინა. გარდა ამისა, გელაზონიას თქმით, ეს ტრანზაქცია ქონებით 110%-ით უნდა ყოფილიყო უზრუნველყოფილი, თუმცა უზრუნველყოფის თანხამ დაახლოებით 3 მილიონი შეადგინა.

„ჩვენს ხელთ არსებული ინფორმაციით, შევისწავლეთ 2007-2012 წლებში „სამგორი ჯგუფთან“ დაკავშირებული ტრანზაქციები და უნდა დაგვედგინა, ამ ჯგუფის დაკრედიტებისას ხდებოდა თუ არა ინტერესთა კონფლიქტის დარღვევა“, - განაცხადა გელაზონიამ.

საქართველოს გენერალური პროკურატურა „თიბისი ბანკის საქმეზე“ გამოძიებას უკანონო შემოსავლის ლეგალიზაციის ფაქტზე აწარმოებს. საუბარია 17 მილიონამდე დოლარის ტრანზაქციაზე. 8 იანვარს ცნობილი გახდა, რომ გენერალურმა პროკურატურამ მიმდინარე გამოძიების ფარგლებში „თიბისი ბანკიდან“ გარკვეული დოკუმენტაცია ამოიღო.

მამუკა ხაზარაძესა და ბადრი ჯაფარიძეს 2019 წლის 24 ივლისს ბრალი წარედგინათ ჯგუფურად, 16 664 000 ამერიკული დოლარის უკანონო შემოსავლის ლეგალიზაციის ფაქტზე, რასაც თან ახლდა განსაკუთრებით დიდი ოდენობით შემოსავლის მიღება (დანაშაული გათვალისწინებული საქართველოს სისხლის სამართლის კოდექსის 194 მუხლის მე-2 ნაწილის ,,ა“ და მე-3 ნაწილის „გ“ ქვეპუნქტებით)“.  მამუკა ხაზარაძემ საზოგადოებრივ მოძრაობის დაფუძნების შესახებ 9 ივლისს განაცხადა.

26 ივლისს სასამართლომ მამუკა ხაზარაძესა და ბადრი ჯაფარიძეს აღკვეთის ღონისძიების სახით, თითოეულს 700 000 ლარიანი გირაო შეუფარდა. ამავე საქმის ფარგლებში გენერალურმა პროკურატურამ ბიზნესმენ ავთანდილ წერეთლის წინააღმდეგ სისხლის სამართლის საქმე 22 აგვისტოს აღძრა. საგამოძიებო უწყების განმარტებით, საქმე ეხება „თიბისი ბანკის“ ხელმძღვანელების მიერ უკანონო შემოსავლების ლეგალიზაციაში დახმარებას. საქალაქო სასამართლომ წერეთელს აღკვეთის ღონისძიების სახით 500 000 ლარის ოდენობის გირაო შეუფარდა, რაც მისმა ადვოკატმა გაასაჩივრა.

სხდომის დაწყებამდე ბრალდებულებმა პოლიტიკური განცხადებები გააკეთეს. მამუკა ხაზარაძის განცხადებით, საქმეს სამართლებრივი საფუძველი არ აქვს და ის პოლიტიკურ დევნას წარმოადგენს. ავთანდილ წერეთელი ამ საქმეს კვლავ ტელეკომპანია „პირველს“ უკავშირებს, მამუკა ხაზარაძე და ბადრი ჯაფარიძე კი - იმ პოლიტიკურ მოძრაობას, რომელიც მათ დააფუძნეს.