ბაჩო ახალაია პრეზიდენტს სთხოვს არ შეიწყალოს

თავდაცვის და შინაგან საქმეთა ყოფილი მინისტრის, ამჟამად კი მსჯავრდებული ბაჩანა ახალაიას Facebook-ის გვერდზე განცხადება ვრცელდება, რომლის ადრესატი საქართველოს პრეზიდენტია. მას ხელს თავად ახალაია აწერს. ამ განცხადებას მისი მეუღლე და ადვოკატი, ანი ნადარეიშვილიც აზიარებს თავის გვერდზე.

განცხადებაში საუბარია შეწყალების შესახებ დოკუმენტზე, რომელსაც ახალაია გაუგებარს უწოდებს და მარგველაშვილს თხოვს, არ შეიწყალოს ის.

“წუხელ ციხეში რაღაც მოულოდნელი დოკუმენტი გამაცნეს. აღმოჩნდა, რომ ეს იყო შეწყალების კომისიის მხრიდან ჩემი საქმის გამოთხოვა, ანუ შეწყალების კომისია ჩემთვის სრულიად გაუგებარი მიზეზებით აპირებს ჩემი საკითხის განხილვას.

ბატონებო, მინდა გითხრათ, რომ უკიდურესად გაკვირვებული ვარ, თქვენ რატომ, რისთვის უნდა განიხილოთ ის, რაც მე თქვენთვის არასდროს მითხოვია და არც არასდროს ვაპირებ ასეთი თხოვნით მომართვას. იმედია ნებას იბოძებთ და იმაში მაინც გამარკვევთ, თუ ვინ მოგმართათ ასეთი თხოვნით“, - ნათქვამია განცხადებაში.

თავდაცვისა და შინაგან საქმეთა ყოფილ მინისტრს, ბაჩო ახალაიას, რომელიც 2012 წლის ნოემბერში დააპატიმრეს, თავდაპირველად სამ საქმეზე ჰქონდა ბრალი წაყენებული; მათგან ორში ის გაამართლეს, ერთში კი დამნაშავედ ცნეს; ის 2013 წლის ნოემბერში მაშინდელმა პრეზიდენტმა მიხეილ სააკაშვილმა შეიწყალა. თუმცა, ახალაია არ გამოუშვეს ციხიდან, რადგანაც სასამართლომ მას მორიგი წინასწარი პატიმრობა შეუფარდა გირგვლიანის მკვლელობის საქმესთან დაკავშირებით, რომელშიც მას სამსახურებრივი უფლებამოსილების გადამეტება ედება ბრალად. 2014 წლის ჯერ იანვარში და შემდეგ ივლისში პოკურატურამ მას დამატებით რამდენიმე ბრალდება წაუყენა, მათ შორის გადამდგარი პოლკოვნიკის სერგო თეთრაძის და კიდევ რამდენიმე სამხედროს წამების საქმეზე. ეს პროცესი დღემდე მიმდინარეობს.