მაია ნიკოლეიშვილმა მოზარდების მკვლელობის საქმის პროკურორებზე გენინსპექციის შეკითხვებს უპასუხა

26 მაისს, თბილისის საქალაქო სასამართლოში ხორავას ქუჩაზე მოზარდების მკვლელობის საქმის განხილვისას მომხდარ ინციდენტთან დაკავშირებით, დამოუკიდებელი ექსპერტი მაია ნიკოლეიშვილი მთავარი პროკურატურის გენერალურ ინსპექციაში გამოკითხვაზე იყო. მას ორი საათის განმავლობაში კითხავდნენ. ინფორმაციას 1tv ავრცელებს.

საქმე შეეხება ნიკოლეიშვილის განცხადებას იმის თაობაზე, რომ მოზარდების მკვლელობის საქმის პროკურორები ზვიად ფხაკაძე და ინა გუგუშვილი მის მიმართ აგრესიით არიან განწყობილები და მის დაშინებას ცდილობენ. 

"განვმარტე, რომ ის ატმოსფერო, რომელიც სუფევდა პროკურორების მიერ იმ დღეს, პრაქტიკულად იყო ძალიან დაძაბული. მე ვთქვი, რომ ზვიად ფხაკაძე და ინა გუგუშვილი, ერთიც და მეორეც, ითხოვდა სისხლის სამართლის აღძვრას. პროკურორების მხრიდან საუბარი იყო, რომ ჩემს მიერ წარმოდგენილი დასკვნა იყო სულელური და აბსურდული", - თქვა მაია ნიკოლეიშვილმა გენინსპექციაში გამოკითხვის შემდეგ.

პროკურორების უკმაყოფილება 26 მაისს ნიკოლეიშვილის ექსპერტიზის დასკვნამ გამოიწვია (რომელიც მან ადვოკატების დაკვეთით ჩაატარა). დასკვნაში წერია, რომ საქმეში არსებული დანების გარდა დაღუპულებისთვის დაზიანებები შესაძლოა, მიყენებული ყოფილიყო სხვა ბასრი საგნებითაც.

პროკურორი ზვიად ფხაკაძე აცხადებს, რომ მზად არის მისი მისამართით არსებულ შეკითხვებს პასუხი გასცეს, რადგან არ ეთანხმება ქსპერტ მაია ნიკოლეიშვილისა და დაცვის მხარის ბრალდებებს. 

ნიკოლეიშვილის განცხადებასთან დაკავშირებით, გენინსპექციამ პროკურორების მხრიდან სავარაუდო გადაცდომის ფაქტზე მოკვლევა დაიწყო.

გასული წლის 1 დეკემბერს თბილისის ცენტრში, ვერაზე ორი არასრულწლოვანი დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე მოზარდი მრავლობითი დაზიანებებითსაავადმყოფოში მოთავსებიდან, მეორე დღეს, 2 დეკემბერს გარდაიცვალა. 

შინაგან საქმეთა სამინისტროს ინფორმაციით, ხორავას ქუჩის ინციდენტის გამო 2001 წელს დაბადებული პირი განზრახ მკვლელობის ბრალდებით 2 დეკემბერს დააკავეს. 

მანამდე, პროკურატურამ ამ დანაშაულისთვის ორი პირი პასუხისგებაში მისცა. 4 დეკემბერს კი, სასამართლომ მათ აღკვეთის ღონისძიების სახით პატიმრობა შეუფარდა.