შს მინისტრი: პოლიციელების ხელფასი კიდევ გაიზრდება

შინაგან საქმეთა მინისტრი გიორგი გახარია აცხადებს, რომ ახლო მომავალში ძალოვანი უწყების თანამშრომლებს ხელფასი კიდევ გაეზრდებათ. გახარიას განმარტებით, ანაზღაურების ზრდის პირველი ეტაპი უკვე განხორციელდა და პროცესი კიდევ გრძელდება.

„ჩვენ უკვე მოვახერხეთ და 13 200 პოლიციელს გავუზარდეთ ხელფასი, თუმცა ეს არის მხოლოდ პირველი ნაბიჯი და ასევე მინდა ვთქვა, რომ უახლოეს პერიოდში გაგრძელდება ხელფასების ზრდა სისტემაში.

ეფექტური და პოლიტიკურად თავისუფალი შინაგან საქმეთა სამინისტრო გახლავთ ის ინსტიტუცია, რომელიც ჩვენ მოქალაქეებს შეუქმნის საშუალებას, გამოწვევების მაგივრად შესაძლებლობების ქვეყანაში იცხოვრონ“, - განაცხადა გიორგი გახარიამ.

დღესვე, შს მინისტრმა პარლამენტში სიტყვით გამოსვლისას კრიმინალურ პოლიციაში მართლწესრიგის ოფიცრის ინსტიტუტის შემოღებაზე ისაუბრა და თქვა, რომ  მართლწესრიგის ოფიცრის 365 ვაკანსიაზე ამ დროისთვის 1 700-ზე მეტი განაცხადია შესული. 

მინისტრმა ისაუბრა ასევე პოლიციის აკადემიაში ანაზღაურებად სტაჟირებაზე.

გიორგი გახარიას განმარტებით, შინაგან საქმეთა სამინისტროს სტრუქტურებში მოხვედრის ერთადერთი გზა პოლიციიის აკადემიაში ანაზღაურებადი სტაჟირების გავლა იქნება. სტაჟირებისა და აკადემიაში სწავლის პერიოდში პირველი 3 თვის განმავლობაში საშტატო სარგოს 50%-ს მიიღებს, ხოლო შემდგომი 9 თვის განმავლობაში მიიღებს სრულ სარგოს.