ცნობილია, რა ეტაპებს გაივლიან მოქალაქეები შსს-ში დასაქმებამდე

შინაგან საქმეთა სამინისტროში სამსახურში მიღების წესში ცვლილებაა. ბრძანება უკვე ხელმოწერილია. უწყებაში მოხვედრის ერთადერთი გზა ანაზღაურებადი სტაჟირება და შინაგან საქმეთა სამინისტროს აკადემიაში საბაზისო კურსების გავლაა. ამის შესახებ შს მინისრობის კანდიდატმა გიორგი გახარიამ პარლამენტში განაცხადა.

გახარიას განმარტებით, სამინისტროს მიერ ტესტირების შედეგად ამორჩეული მოქალაქის სტაჟირებისა და სწავლის პერიოდი ანაზღაურებადი იქნება.

საბაზისო კურსების გავლის დროს საქართველოს თითოეული მოქალაქე, რომელიც იქნება შინაგან საქმეთა სამინისტროს მიერ გავლილი ტესტირების შედეგად ამორჩეული, მისი სტაჟირებისა და სწავლის პერიოდი აკადემიაში ანაზღაურებადი იქნება.

სტაჟირებისას მოქალაქე პირველი სამი თვის საბაზისო კურსების გავლის პერიოდში მიიღებს საშტატო სარგოს 50%-ს, ხოლო 9-თვიანი საგამოცდო პერიოდის განმავლობაში სრულ სარგოს.

„ეს იქნება ის ინსტიტუციონალური პროცესი, რისი საშუალებითაც თითოეული ადამიანი შეძლებს, მოხვდეს შინაგან საქმეთა სამინისტროში. ამას ვაკეთებთ მხოლოდ იმ მიზნით, რომ ძალიან კარგად გვესმის, ვერანაირი სოციალური სტატუსი, ხელფასის ზრდა, საყოფაცხოვრებო პირობების გაუმჯობესება, სოციალური დაცვის გაძლიერება ვერ იქნება გარანტი, რომ ადამიანური რესურსი შინაგან საქმეთა სამინისტროში ხარისხობრივად გაუმჯობესდეს. ამას სჭირდება  ინსტიტუციონალური განათლებისა და პროფესიული ზრდის მექანიზმები, რომელსაც  ახლა ვქმნით. ჩვენ ყველაფერს ვაკეთებთ, რათა საუკეთესო კადრები, საუკეთესო ახალგაზრდები მოდიოდნენ შინაგან საქმეთა სამინისტროში, მათ იცოდნენ, რომ მათი სოციალური, პროფესიული ზრდის გარანტიები შექმნილია სახელმწიფოს და ინსტიტუტის მიერ”, – განაცხადა გიორგი გახარიამ.

13 ივლისს, შს მინისტრმა პარლამენტში სიტყვით გამოსვლისას კრიმინალურ პოლიციაში მართლწესრიგის ოფიცრის ინსტიტუტის შემოღებაზე ისაუბრა და თქვა, რომ  მართლწესრიგის ოფიცრის 365 ვაკანსიაზე ამ დროისთვის 1 700-ზე მეტი განაცხადია შესული. 

მინისტრმა ასევე განცხადა, რომ ახლო მომავალში ძალოვანი უწყების თანამშრომლებს ხელფასი კიდევ გაეზრდებათ.