გახარია „ომეგა ჯგუფის“ სარჩელზე: დიდი ხანია ლონდონში არ ვყოფილვარ და დიდი სიამოვნებით ჩავალ

საქართველოს შინაგან საქმეთა მინისტრმა გიორგი გახარიამ "ომეგა ჯგუფის" საქმეზე პირველი კომენტარი გააკეთა. "ძალიან დიდი ხანია ლონდონში არ ვყოფილვარ, დაახლოებით 6 წელია და დიდი სიამოვნებით ჩავალ", - ასე გამოეხმაურა გახარია „ომეგა ჯგუფის" ადვოკატების განცხადებას, რომლის მიხედვითაც ისინი ლონდონის სასამართლოში წარსადგენად სარჩელებს ამზადებენ საქართველოს ხელისუფლების მოქმედი და ყოფილი წარმომადგენლების, მათ შორის შს მინისტრის მიმართ.

" საკმაოდ დიდი ხნის განმავლობაში ვიყავი ბიზნესომბუდსმენი. ძალიან კარგად ვიცი ბიზნესის და სახელმწიფოს ურთიერთობის ანატომია. შეუდარებელ თემებზე ვსაუბრობთ ბიზნესისა და სახელმწიფოს ურთიერთობაზეც, რაც იყო და რაც არის ახლა", - განაცხადა გახარიამ.

კომენტარი გააკეთა თავდაცვის მინისტრმა ლევან იზორიამაც.

„გამოძიება დაიწყო. თუ გამოიკვეთა გარკვეული ტიპის დანაშაული, იქნება მყისიერი რეაგირება. თუმცა, ხაზგასმით მინდა აღვნიშნო, რომ ამ პროცესის გარკვეული პოლიტიკური ნიშნებით წარმართვა არის ყოვლად მიუღებელი. მით უფრო პროცესის გამოყენება კანონიერი მოთხოვნის უგულებელყოფისთვის, რაც საგადასახადო დავალიანებასთან არის დაკავშირებული, ასევე, ყოვლად მიუღებელია. პროცესი დაადგენს ჭეშმარიტებას და ნათელი მოეფინება ყველაფერს", - განაცხადა იზორიამ.

26 სექტემბერს გაირკვა, რომ "ომეგა ჯგუფმა" ლონდონის სასამართლოში საქართველოს მოქმედი და ყოფილი მაღალჩინოსნების წინააღმდეგ სამართლებრივი პროცედურა დაიწყო. ამის შესახებ "ომეგა ჯგუფის" ადვოკატმა კოლინ გიბსონმა თქვა. 

მედიაში გავრცელებული ჩანაწერების გამო პროკურატურაში გამოძიება 12 სექტემბერს დაიწყო, ჩანაწერებზე ექსპერტიზის ჩატარება იგეგმება. 

პირველი ჩანაწერი რამდენიმე კვირის წინ "იბერიას" ეთერში გამოქვეყნდა, რომლის მფლობელიც "ომეგა ჯგუფია". არხი ამტკიცებს, რომ ხელისუფლება „ომეგას“ ბიზნესზე ზეწოლით მას ავიწროებს და „თავისუფალი სიტყვის ჩახშობა სურს“. ფინანსთა მინისტრმა ბრალდებები უარყო და განაცხადა, რომ „ომეგა ჯგუფს“ 51 მილიონ ლარზე მეტი საგადასახადო დავალიანება აქვს და სახელმწიფოსგან შეღავათიანი რეჟიმის დაწესების მიუხედავად ვალის გადახდა არ სურს, ტელევიზიას კი შანტაჟისთვის იყენებს.   

„ომეგა ჯგუფთან“ დაკავშირებული სავარაუდო კორუფციული სკანდალის ფარული ჩანაწერის ერთ-ერთი ფიგურანტია, კონკურენციის სააგენტოს ხელმძღვანელი ნოდარ ხადური. ის ჩანაწერს ცრუს უწოდებს და „ომეგას“ საქმესთან კავშირს კატეგორიულად უარყოფს.

პატივისა და ღირსების შელახვისთვის სამართლებრივ დავას აპირებს ეკონომიკის ყოფილი მინისტრი დიმიტრი ქუმსიშვილი.

"იბერიისა" და "ომეგა ჯგუფის" თემას 12 სექტემბერს პრემიერმინისტრი მამუკა ბახტაძე გამოეხმაურა და განაცხადა, რომ ფინანსთა სამინისტრო და შემოსავლების სამსახური სანქციების დაწესებისგან მაქსიმალურად ცდილობდა თავის შეკავებას. ბახტაძის თქმით, უწყებებმა კომპანია 11-ჯერ გააფრთხილეს, თუმცა ამის შემდეგ ვალი კიდევ უფრო გაიზარდა.

14 სექტემბერს სპორტის ყოფილმა მინისტრმა ლევან ყიფიანმა „საქართველოს რკინიგზის“ სამეთვალყურეო საბჭოს წევრის პოზიცია დატოვა. 17 სექტემბერს კი ის პროკურატურაში გამოკითხეს.