როგორ ებრძვის შსს ფარული ვიდეოჩანაწერების გავრცელებას და რატომ ისჯება მათი შენახვა

საქართველოში ფარული ჩანაწერების გავრცელებასთან დაკავშირებით შსს-ს რეაგირებისა და გამოძიებასთან მიმართულებით არსებულ გამოცდილებაზე შინაგან საქმეთა სამინისტროს კრიმინალური პოლიციის დეპარტამენტის დირექტორმა ვლადიმერ ბორცვაძემ "იმედი LIVE"-ის ეთერში უპასუხა კითხვებს.

ბორცვაძის თქმით, პირველი დოკუმენტი, რომელიც ჩვენს პირად ცხოვრებას და ოჯახურ საიდუმლოებას იცავს კონსტიტუციაა, სადაც წერია რომ პირადი ცხოვრება/ოჯახური საიდუმლოება ხელშეუხებელია და მისი დარღვევის უფლება არავის აქვს გარკვეული გამონაკლისების გარდა.

ვლადიმერ ბორცვაძის თქმით, ეს გამონაკლისებია: როდესაც საგამოძიებო ორგანო იძიებს კონკრეტულ სისხლის სამართლის საქმეს. გამოძიებას იმ შემთხვევაში შეუძლია ჩვენს პირად სივრცესა და ცხოვრებაში გარკვეული ინფორმაციის მოპოვების უფლება, როდესაც არსებობს გარკვეული საფუძველი. ეს საფუძველია - მტკიცებულებების მოპოვების კუთხით მოსამართლის მიერ გაცემული განჩინება - ვარაუდი, რომ კონკრეტულმა ადამიანმა ჩაიდინა დანაშაული და ეს უფლების შემზღუდავი ღონისძიება აუცილებელია მტკიცებულებების მოსაპოვებლად.

კონსტიტუციის შემდეგ არის სისხლის სამართლის კოდექსი, სადაც არის მუხლი, რომელიც რომელიც არის პირადი ცხოვრების საიდუმლოების ხელყოფას დასჯად ქმედებად მიიჩნევს.

"პირველი ქმედება რაც ისჯება ეს არის პირადი ცხოვრების ამსახველი საიდუმლოების ამსახველი ნებისმიერი ინფორმაციის მოპოვება. შესაბამისად თუ ადამიანი ნებისმიერი ფორმით მოიპოვებს პირადი ცხოვრების ამსახველ ნებისმიერ მონაცემს, ეს დანაშაულია. ამასთან, ეს დანაშაულია იმ შემთხვევაშიც თუ მონაცემი მოპოვებულია იმ პიროვნების ნების საწინააღმდეგოდ და მისი თანხმობის გარეშე, ვისაც ეს მონაცემები ეხება", - განმარტავს ბორცვაძე.

შემდეგი ქმედება ვლადიმერ ბორცვაძის განმარტებით არის შენახვა - თუ მაგალითად კონკრეტულმა პირმა არ მოიპოვა, მაგრამ მას გაუზიარეს და ეს ჩანაწერი ნახა, გაეცნო და შეინახა, ესეც დანაშაულია. რატომ შეიძლება იყოს შენახვა დანაშაული?

"საზოგადოებაში გაჩნდა კითხვა: მე თუ ჩემმა მეგობარმა გამომიგზავნა პირადი ცხოვრების ამსახველი ვიდეოჩანაწერი, გავხსენი ტელეფონი, გავეცანი მას და შევინახე - რა საფრთხეებია ამ შემთხვევაში: იმ მომენტისთვის მე თუ არ მქონდა ამ ჩანაწერის გავრცელების განზრახვა, ეს იმას არ გამორიცხავს, რომ ხვალ ანალოგიური განზრახვა არ გამიჩნდება", - თქვა ბორცვაძემ და დასძინა, რომ ჩანაწერი უნდა წაიშალოს. ასევე ბორცვაძემ თქვა, რომ მოქალაქეს კანონი ავალდებულებს, როდესაც ის დანაშაულის მომზადების, ჩადენის შესახებ იღებს ინფორმაციას, სამართალდამცავ ორგანოს აცნობოს.

ამასთან, ვლადიმერ ბორცვაძის თქმით, კანონის არცოდნა ადამიანს პასუხისმგებლობისგან არ ათავისუფლებს, ასევე არ ათავისუფლებს "მეგობრობაც". 

რაც შეეხება შინაგან საქმეთა სამინისტროს მიერ მსგავსი ტიპის საქმეების გამოძიებაში დაგროვებულ ცოდნას, ვლადიმერ ბორცვაძე ამბობს, რომ უწყებას ამ მიმართულებით გამოცდილება აქვს და არაერთი საქმე გამოუძიებიათ ამ ტიპის დანაშაულის:

"მსგავსი კატეგორიის საქმეების გამოძიება შეგვიძლია და თუ ამ დანაშაულის ჩამდენ პირებს ჰგონიათ, რომ იმდენად შეინიღბებიან და ლატენტურები იქნებიან, რომ კვალზე ვერ გავალთ, პირდაპირ ვეტყვი, რომ ძალიან ცდებიან", - თქვა ბორცვაძემ და დასძინა, რომ გამოძიების ფარგლებში შსს თანამშრომლობს არა მხოლოდ ქართულ, არამედ საერთაშორისო კომპანიებთანაც:

"ჩვენ მათთან თანამშრომლობის რამდენიმე ბერკეტი გაგვაჩნია. ჩვენ ვართ ინტერპოლის წევრი ქვეყანა, ასევე ვთანამშრომლობთ ევროპოლთან, 24-საათიან რეჟიმში ხდება მათთან ინფორმაციის გაცვლა, ასევე ვართ კონვენციის წევრი, რომლის მიხედვითაც მსოფლიოს ნებისმიერ ქვეყანაში შეგვიძლია გავგზავნოთ სამართლებრივი დახმარების შესახებ შუამდგომლობა, მოვითხოვოთ კონკრეტული საგამოძიებო მოქმედებების ჩატარება და ადგილობრივი სამართალდამცავი უწყების წარმომადგენლები ამ მოქმედებებს ახორციელებენ. ასევე შეგვიძლია ოპერატიული თანამშრომლობის კუთხით ვიურთიერთოთ და ინფორმაცია მივიღოთ როგორც Facebook-იდან ასევე სხვა ინტერნეტპროვაიდერისგან", - თქვა ვლადიმერ ბორცვაძემ. 

ვლადიმერ ბორცვაძის თქმით, მიმდინარე გამოძიების ფარგლებში მათი მთავარი მიზანია გამოძიება მივიდეს იმ პირველ წყაროსთან, ვისგანაც პირადი ცხოვრების ამსახველი ფარული ჩანაწერი გავრცელდა. ბორცვაძე ასევე ამბობს, რომ შინაგან საქმეთა სამინისტრო ამ გამოძიებასთან დაკავშირებით სპეკულაციებს არ აჰყვება:

"ჩვენ ვხელმძღვანელობთ შესაბამისი კანონმდებლობით და მტკიცებულებების თუ ნებისმიერი ინფორმაციის მოპოვებისას ვხელმძღვანელობთ კანონით, კანონში გაწერილი პროცედურებით. აქედან გამომდინარე ამ პროცედურებს მივყვებით და კანონის სრული დაცვით მოვიპოვებთ მტკიცებულებებს", - თქვა ბორცვაძემ.