ცქიტიშვილმა ანაკლიის პორტში პირველი გემის შესვლის თარიღის გადავადება არ გამორიცხა

საქართველოს რეგიონული განვითარებისა და ინფრასტრუქტურის მინისტრმა, მაია ცქიტიშვილმა საპარლამენტო მოსმენაზე განაცხადა, რომ ანაკლიის პორტში პირველი გემის შემოსვლა 2020 წლის ივლისშია დაგეგმილი, მაგრამ ვინაიდან კონსორციუმს დაფინანსება არ აქვს, სავარაუდოდ, ეს ვადებიც დაირღვევა,

"ხელშეკრულების პირობების შესაბამისად, ძირითადი სამშენებლო სამუშაოები, ანუ პორტის მშენებლობა უნდა დაწყებულიყო 2017 წლის 31 დეკემბრამდე, მას შემდეგ, რაც ინვესტორი მოახდენდა სრულ ფინანსურ დახურვას ანუ მოიზიდავდა როგორც საკუთარ დაფინანსებას, კაპიტალს, ასევე ნასესხებ თანხებს, იმდენს, რამდენიც სჭირდებოდა ამ პროექტის განხორციელებისთვის, მას შემდეგ, რაც დასრულდებოდა საპროექტო დოკუმენტაცია, შეირჩეოდა მშენებელი და შეთანხმდებოდა მთავრობასთან კონტრაქტორი კომპანია, პორტის ოპერატორი და მას შემდეგ, რაც ხელშეკრულებით გათვალისწინებული წინასამშენებლო გარანტიები ჯამურად 40 მილიონი დოლარის ოდენობით იქნებოდა წარმოდგენილი.

გარდა ამისა, 2018 წლის სექტემბერში დაიწყო ის სამუშაოები, რომელთაც ჩვენ ახლა ვხედავთ. ეს არის ფსკერის დაღრმავების სამუშაოების პირველი წინასწარი ფაზა. ეს სამუშაოები რომ დაწყებულიყო, ჩვენ შევიტანეთ ცვლილებები ხელშეკრულებაში, გამოვიტანეთ ეს სამუშაოები ძირითადი ფაზიდან მოსამზადებელ ფაზაზე, რაც ნიშნავდა იმას, რომ ამ სამუშაოების შესრულებაზე ნებართვა მივეცით, სანამ იყო დასრულებული საპროექტო სამუშაოები, არ გვყავდა შერჩეული პორტის ოპერატორი, მშენებელი კონტრაქტორი და რაც მნიშვნელოვანია, კონსორციუმს არ ჰქონდა მოზიდული არც საკუთარი დაფინანსება და ასევე არ იყო სრულად მოზიდული ის სასესხო კაპიტალი, რომელიც არის საჭირო ამ პროექტის განხორციელებისთვის“, - განაცხადა მაია ცქიტიშვილმა.

საქართველოს ვიცეპრემიერმა პარლამენტში, ანაკლიის პორტის მშენებლობასთან დაკავშირებულ საკითხებზე გამოსვლისას, საერთაშორისო საფინანსო ინსტიტუტების მოთხოვნებზე ილაპარაკა, რომელიც 8 ძირითად ცვლილებას მოიცავს.

"მე-5 პუნქტია ოქროს წილთან დაკავშირებული მოთხოვნა. პროექტის განმახორციელებელ კონსორციუმში სახელმწიფოს აქვს მხოლოდ ერთი აქცია.  არსებული ხელშეკრულებით, ამ  ოქროს აქციით სახელმწიფოს აქვს უფლება, რომ მოითხოვოს რიგ არსებით საკითხებზე თანხმობა. ბანკების წინადადებაა, რომ ამ ოქროს აქციის და შესაბამისად, სახელმწიფოს ზემოქმედების მექანიზმი და უფლებები შემცირდეს მნიშვნელოვნად, მინორიტარული ინტერესის უფლებამდე“, - განაცხადა მაია ცქიტიშვილმა.

ვიცეპრემიერის ინფორმაციით, შემდეგი პუნქტები ეხება იმ მოვლენებს, რომელიც განაპირობებს ვადების გაგრძელებას, კომპენსაციას ან პოლიტიკურ ფორსმაჟორს და ყველა შემთხვევაში, ცვლილებები, არსებულ რედაქციასთან შედარებით, სახელმწიფოს ინტერესებს აზიანებს.